Tikelt-a, d Tizi kan i terza temsalt n usidef n tmaziɣt deg yiɣerbazen n twilayt merra. D ayen swayes i d-iweɛɛed uneɣlaf n usegmi, Mass Benbouzid.
D acu kan, gar wawal d tilawt – nuɣ tanumi – afrag hraw, iɛella. Wissen abrid-a ma ad d-ḍḥun mgadan. Acku, ayen ibanen, yella, mazal-it yettɛeggiḍ.
Yiwet, akken i t-id-yenna yiwen n uselmad, « deg temdint yakan n Tizi-Wezzu, sin n yiɣerbazen ilemmasen, msumman, yiwen yesɛa tamaziɣt wayeḍ,; ulac. » Tayeḍ,; amaswaḍ n tmaziɣt yeḥbes deg uxeddim, yuɣal s aɣerbaz. Ḥebsen-t s txazabiyin. Am wakken drus-as, mazal yewwiḍ yidis-is ɣer tmurt, necden-t ad yuɣal d amsaɛef n yimaswaḍen imaynuten ; bɣan ad yexdem ddaw n leɛnaya-nsen.
Seg melmi akka i tuɣal tenmehla n usegmi tessirid s useɣwen i yixeddamen-is ?
Tella ula d tiferɛent ! Ilindi, mmi-s n yiwen n yimḍebber n tenmehla n usegmi, ɣef wakken i aɣ-d-yewweḍ yisalli, ur yeɣri ara tamaziɣt am netta am yimdukal-is. Fkan-as ttesriḥ.
Tura, ma yella ad yessiweḍ lweɛd n uneɣlaf n usegmi aɣelnaw, a rrbeḥ a tafat !
Timsal am ti, ma qqiment war tifrat, ad d-yeggri usewseɛ n uselmed n tmaziɣt d anɛaybu !
Da, awal yerza Tizi.
Ma d Bgayet d Tubiret, urɛad tent-id-iẓur uneɣlaf akken ad nwali d acu n umaynut swayes ara d-yeglu. Maca, neẓra ggten wuguren. Tamaziɣt, ulac-itt deg yiɣerbazen merra.
Ar melmi ?
Dj. Ikhloufi