Tasnawit Colonel Mohand Oulhadj di Buzgan, tettidir yir taswiεt imi tagnit tluɣ aṭas. Inelmaden n uɣerbaz-agi urεad uɣalen ɣer wulmud-nsen ar ass-a ɣas akken aɣlif n usegmi yegzem-itt ɣef tuɣalin ass n 13 di ctember 2009. Ugur yellan mači n wass-a, n useggas yezrin, yuɣ lḥal tanmehla n ttrebga n twilayt n Tizi-Wezzu tesqerdec taluft-agi mazal kan ur tt-itefri ara. Iɣil n wuzal yella-d gar yiselmaden akked unemhal n tesnawit-a. Ddurt-agi yezrin, iselmaden sufɣen-d yiwen wulɣu anda i d-xebbren imawlan n yinelmaden, imḍebbren εlayen ama d tanmehla n usegmi, ama d tawilayt n Tizi-Wezzu, ama d aɣlif n leqraya, ɣef uneḥbus-agi leqraya anda i d-begnen lɣiḍ-nsen ɣef ttaεdiyat, lbaṭel d miḥyaf i ixeddem unemhal-agi n tesnawit fell-asen. Deg ulɣu-ya, iselmaden sutren deg yimḍebbren d wid teεna temsalt akken ad-gren afus-nsen i tifrat n wugur-agi s lεejlan anda i t-gezmen di rray ulac tuɣalin alamma yeṭṭaxer unemhal-agi deg tesnawit. D tidet, tiyita i t-yeččan d inelmaden, meɛna imḍebbren d acu i ttrajun akken ad frun ugur i d-yennulfan seg yilindi ?
Islam Bessaci