Lexmis-a yezrin, asqamu n tɣiwant n Wad-Γir, yesbed Mass Naser Mohdeb, ɣef uqerru n tɣiwant. Sersent mi kksen tiqqa deg uselway amezwaru yellan ɣef uqerru n lecɣal n tɣiwant. Asqamu n tɣiwant-a, ibedd s 9 yiεeggalen. Sin seg lejrida tilellit tamezwarut, ansa i d-yefrari Buεlam Ɛayadi (aselway iɣef tettwakkes tiqqa) ; wayeḍ seg lejrida tilellit t-2, sin n ukabar F.L.N ; ma d ikabaren RCD, FFS, RND d MEN, yal yiwen deg-sen yekseb akersi. Uguren, deg tɣiwant bdan-d acḥal-aya. Seg tama, iεeggalen n tɣiwant qqaren : « Qrib aseggas segmi yeḥbes uxeddim deg tɣiwant. Ma d aselway yettaddam rray iman-is fiḥel ma icawer tasqamutt. » Kra yakk yellan, yerna-d fell-as aseḥbes n tilifun d lexlas n yiwen n la garde communale. Deg tama-nniḍen, imezdaɣ ddren lmerta. Wa la yeqqar ixeddem i taddart-is kan At Ɛeyyad, wa la k-yeqqar iseḥma amkan yeqqim ma d lxedma ad d-yawi Rebbi, wa yeqqar segmi nesbedd asqamu ur d-tḍal fell-aneɣ. Taɣiwant d tudrin-is d yimezdaɣ-is smuzguten. Γer taggara, 6 deg yiεeggalen n usqamu, refden rray, ad selḥun amagrad 55 n lqanun n tɣiwanin, i d-yeqqaren ɣur-sen lḥeq ad kksen aselway, ad t-beddlen s wayeḍ. Γef usmekti kan, ɣur-neɣ tura azal n waggur segmi imezdaɣ n Mellala, yeṭṭafaren taɣiwant n Wed-Γir, qeflen abrid imi lecɣal qqimen akken llan, ama d aman ama d areqqeε yiberdan,… Buεlam Ɛayadi, iɣaḍ-it lḥal ɣef uselway-a ajdid iqeblen akk lxaluḍa ideg t-gran yikabaren-nniḍen. « Wigad-a yakan ur t-neqbil ad yili d aselway wis-sin deg yiwet n tallit, anda anagar nekk i t-idufεen, tura yeqleb lfista fell-i ! » Ilaq ad d-nini belli deg tɣiwanin, Buεlam Ɛayadi d amezwaru iwumi qeblen imsulta n twilayt n Bgayet ad yettwikkes.
Mohand Ouhmed