Anwa, gar yiselmaden n tmaziɣt, ur nessin amaswaḍ Ali Bekhti n Tizi-Wezzu ? Meɛna, anwa i d-yekkren, ass-a, seg yiselmaden n tmaziɣt, imi t-rran ɣer tneɣrit, imi t-rran d aselmad, mbeɛd n 8 yiseggasen n uxeddim. 8 yiseggasen, ulac aselmad n tmaziɣt ur iwelleh ; ulac aselmad n tmaziɣt i yessexser ; ulac, daɣen, aselmad i yesserbeḥ akka kan.
Mass Ali Bekhti, seg wasmi i t-id-yesbedd uɣlif n usegmi d amaswaḍ n tmaziɣt deg twilayt n Tizi-Wezzu aseggas 2001, ur yeǧǧi aɣerbaz, ur yexlif aselmad, ur yeɛdiz i uxeddim ; icemmer iɣallen i wuguren yettemlil uselmed n tmaziɣt, i ttemlilen yiselmaden. Ass-a, yettwakkes, awal ur d-yuli sɣur yiselmaden. Ali, mačči d win yettnadin ɣef cciɛa neɣ ɣef umḍiq. Ixeddem i tmaziɣt, yekkat ɣef tmaziɣt, yettnaɣ ɣef tmaziɣt, yettazzal ɣef tmaziɣt mačči i yemdanen, mačči i yinemhalen, mačči i trebbaɛ yettandin i tmaziɣt, mačči i wid yeslufuten afus n lḥekkam. Akka, ziɣen qeddcen-d taluft, yiwen inawel wayeḍ yesserwet. Amek ara tizmir tenmehla n usegmi n twilayt n Tizi-Wezzu, ad tekkes amaswaḍ i d-yesres uɣlif n usegmi aɣelnaw ?
D acu kan, tadyant i iḥuzan Ali, tḥuza aselmed n tmaziɣt. Yerna akken i tḥuza Ali, azekka ad tḥaz wayeḍ. Ḍrant yakan, mazal ad ḍrunt tiyaḍ ! Meɛna, Amaswaḍ Ali ad yeqqim d amaswaḍ,; d ulaqrar ad yali wass, ad qreqren yezgaren mi ara slen i ṭṭikuk !
Dj. Ikhloufi