Di tmanyin yid-sen i nnejmaɛen tameddit n lexmis iɛeddan zdat ugezdu (daira) akken ad ssiwḍen reffu-nsen i yimḍebbren. Ur uminen ara d akken ur ten-id-yettsaḥ ara umkan di ssuq ajdid. Nitni ɣillen yal yiwen ad yesɛu amkan akken ad ikemmel ad yexdem ɣef yiman-is d warraw-is. Ssuq amaynut ad yettwikkes, ihi « ulac anida ara zenzen igumma-nsen », i d-yenna yiwen seg yimestujar.
Azal n 108 n yimukan i yellan di ssuq ajdid, ferqen 99, qqimen-d 9, « i wumi-ten ? », i d-nnan yimzenza n lxeḍra d lfakya. B. S. d amzenzu n lxeḍra acḥal aya, yenna-d : « wigi iwumi fkan imukan di ssuq ajdid iseqqfen ur llin ara lebda deg uqdim », ikemmel : « ferqen 99 yimukan, gran-d 9 i… » Ad d-nesmekti kan, imzenza i d-wwin ɣer ssuq iseqqfen d wid n uɣessim (lxeḍra) d wid n uksum ; wid n yiselsa, wwin-ten ɣer tuḥbist n tkeryas taqdimt. Imzenza n uksum di tlatin yid-sen, fkan kan i 6 medden. Tamečča tamatut, ur ten-id-isaḥ ula d yiwen !. Kecmen di 5 yid-sen ɣer yimḍebbren akken ad mmeslayen yid-sen ɣef ccɣel-agi, ad ẓren ssebba.
Si tama n yimḍebbren, yeffeɣ-d isali d akken wid iwumi fkan imukan di ssuq-agi d wid yesɛan registre de commerce. Ar tura, aṭas n yimestujar i yeznuzun din, ur sɛin ara lekwaɣeḍ.
Imḍebbren n twilayt, nitni ran ad gen tillas i wid ur nesɛi lekwaɣeḍ,; ur nettxellis tabzert. Am wakken daɣen, bɣan ad bnun deg umkan-agi tamkerḍit ara itebɛen tamkerḍit taɣelnawt neɣ ad rren d taqaɛet i tmeɣriwin d umezgun (theatre de verdure).
Arab Aguini