Asqamu n ukabar n FFS n tɣiwant n Bgayet yessufeɣ-d yiwen n wulɣu, anda i d-yewwet deg leqdic n lecɣal n tɣiwant yettuɣalen, seg wass ɣer wayeḍ,; ɣer deffir, ɛlaḥsab-is. I usmekti, aselway n tɣiwant yeffeɣ-d seg lejrida n ukabar F.L.N.
Di tazwara, imyura n wulɣu meslayen-d ɣef uḥric n yidrimen ; taɣiwant d tamerkantit, tiɣusar-is (budgets) d wid ileḥqen armi d 2 yimelyaren. Llant tɣiwanin ur nessaweḍ ara ad ḥawcen anect-a, meɛna bnan, sazedgen tamdint. Akken daɣen ur ttun ara ad d-meslayen ɣef uɣilif n tezdeg iɛerqen deg temdint ; ulac amḍiq ur newsix ara. Llant kra lḥumat, imezdaɣ uɣalen bḍan tamezduɣt-nsen d yiɣerdayen. Akken i d-uran deg wulɣu « Bgayet tura, tecba abidun n leknis. »
Ur ttun ara daɣen ad d-meslayen ɣef rrayat i d-ddmen deg yinejmaɛ n tɣiwant, wid iɣef mtafaqen iɛeggalen n tesqamut. Ar tura ula d yiwen deg-sen ur yettwarfed, neɣ ur yebdi. Deg lekwaɣeḍ uran, ma d leqdic ulac.
Ladɣa Bgayet, yettwassnen zik d tamdint n yidles d tẓuri, tura tuɣal d tin n yir lecɣal, armi i aɣ-ttakken medden d lemtel n diri. Tuget n yiberdan, tafat deg-sen ur tettsiɣ ara. Aya yettawi-d lxuf i yimezdaɣ am yimeqqranen am yilemẓyen ; tiwaculin merra.
Mohand Ait Ighil