M. Smail
Ixeddamen i yerza usenfar n ubrid ameqqran yesdukklen Asammar d Umalu n tmurt i iteddun s ufus n Yicinwaten kecmen deg yiwet n liḥala n uḥbas n lxedma. D yiwen n rray i ṭṭfen yixeddamen iwakken ad sutren izerfan-nsen ama d ayen yerzan lxedma neɣ tjarnanin-nsen. Ur telli ara d tigawt tamenzut i ixedmen yemdanen-agi, maca sya ɣer da yettili-d leɛyaḍ ɣef temḥeqranit i ttidiren yixeddamen. Tikelt-a, azal n 300 yixeddamen i yerran tawwurt i tenmehla yessedduyen lecɣal mi akken ugin yimḍebbren ad d-rren ddehn-nsen ɣef yisuturen n yixeddamen. Ineggura-agi dɣa, asmi akken sersen tabrat n uḥbas n lxedma mi iɛedda lɛid, nnan-d aṭas n yizerfan i sen-iruḥen am lexlas ɣef uxeddim iweɛren, tujjya n lxedma d waṭas n tɣawsiwin. Maca, tasqamut i d-yusan si tmaneɣt n Lezzayer ur d-tessawel ara i yixeddamen neɣ ahat i wid iheddren ɣef yismawen-nsen iwakken ad sqerdcen tamsalt. D ayen i yesserfan ixeddamen almi wwḍen ɣer liḥala-agi ur ǧǧin ama d Icinwaten neɣ ahat ikamyunen-nsen ur teffɣen ara ɣer ubrid. Imi ccɣel-agi d ayen ara yesɛeṭṭlen lecɣal n usenfar-agi, yiwet n tesqamut n twilayt n Tubiret terza-d s amkan-agi n lḥers iwakken ad d-afen tifrat i yiɣeblan-agi.