Inelmaden yeqqaren deg uɣerbaz amenzu Hikam Ḥussin deg taddart Senana ur zmiren ara ad d-sfaydin s tuččit deg usečču (la cantine) n uɣerbaz-nsen imi anemhal yezdeɣ deg-s s twacult-is.
Imḍebbren n tɣiwant ur nufi ara tifrat i uɣbel-agi, gren-t ɣer ccreɛ. Maca, ccreɛ i d-yewwi ad yili ass n 4 deg tuber, yettwawexxer s sebba n leɣyab n unemhal-a. Ad d-nerr lwelha belli aɣbel-agi ad yernu ɣer win n twaculin i izedɣen deg yixxamen n uɣerbaz-agi deg useggas 2003 mi nḍerrent tmezduɣin-nsent seg zlezla n lawan-nni. Inelmaden yeqqaren deg uɣerbaz-agi gar-asen wid ileḥḥun 12km deg tnasfa n wass akken ad yečč. Si tama-nsen, imawelan n yinelmaden yennejemaɛen deg wussan iɛeddan suturen seg yimeḍebren n tɣiwant, n la daira d tenmehla n usegmi tifrat i uɣbel-agi d 15 wussan qbel ma begnen-d lɣiḍ-nsen s tawilat-nniḍen.
Dalila I.