Segmi yella d ameẓẓyan, Nadir yenta deffir baba-s, am win yeṭṭafaren aselmad. Yextar abrid-a n tteswira qbel n wiyiḍ. Seg zik i yelmed amek ara d-yessufeɣ tteswira neɣ amek ara d-yextir tallit d umḍiq ansa ara d-yeṭṭef tteswira ilaqen. Ma tezga tsewwart gar yifassen-is, ur as-iεerreq kra, dima yettaf-d acu ara yexdem. Mi t-nesteqsa ɣef tikelt tamezwarut ideg yeffeɣ iman-is ad isewwer kra, yettmektay-d tameɣra-ines tamezwarut i isewwer. S taḍsa yenna-k : « Deg tmanya n tkurin (pellicules) n tteswirat anagar i d-ffɣen snat. Ur k-qqareɣ amek yuɣal wudem yisli, mi yesla s lexber ; amzun d ḥed deg twacult-is i yensan. » Seg yimar d afella i yefhem Nadir Zerwal acu lqima tekseb tteswira deg tudert n umdan.
Γef lxetyar n tẓuri-ya, Nadir yeqqar : « yiwen deg wallalen sway nezmer ad d-nesenṭeq tallit yimar, sway nezmer ad d-neǧǧ later, sway nezmer ad ninig ɣef yiwet tallit anda allalen-nniḍen ur zmiren ad d-siwlen. Anagar tteswira i izemren ad d-tmeslay ɣef cbaḥa n umḍiq akter n wawal. »
Ayen yeεnan allalen n usewwer, Nadir, yeḥmel ad isewwer s tsewwart argentique wala tasewwart numérique. Amek ara twenεeḍ tteswira ? Nadir yeqqar : « tteswira tettwenniε ma yella imal wul ɣur-s, ma yella d tukerḍa. Tikwal ad tili lḥaǧa ur tesεi lqima, meεna ma yeṭṭef-itt-id l’objectif yersen deg ufus n unaẓur, ad as-ibeddel tamuɣli. »
Γas akken Nadir Zerwal, imal aṭas deg tteswirat-is ɣer ugama (nature) d warrac, ulac ayen ur d-yeṭṭif : hah d amdan yefreḥ neɣ yettwaqreḥ,; hah d aɣelluy yiṭij, hah d asigna s talɣa tessedhac, hah d timlilit n waddal hah d tameskant, … ulac acu yeǧǧa ur d-yekki ddaw ufus-is anaẓur. Tteswira ɣer Nadir, d amennuɣ. Ilaq amdan ad d-iḥawes, ad d-yaker s ufus anaẓur deg umkan d tallit ilaqen. « Tteswira yettseyyir-itt lqanun-is : tayri ara s-ibudd yiwen, lebɣi, amkan, tallit, d tmuɣli tanaẓurt umbeεd d atekki deg tqeffalt. » Ata amek i d-isewzel awal ɣef yidis atikni d yidis anaẓur tekseb tteswira.
Ma d ass-a, tteswira teṭṭef ddmam, ilaq ad neḥsu belli tbedd s yinaẓuren yecban Nadir Zerwal.
Mohand Ait Ighil