Tidukla n « Itri Adelsan » n Uqbu, ad textem tifaskiwin n tmedyazt tamaziɣt n useggas-a, s yiwet n temlilit ara yekken 3 wussan seg 24 ar 27 di tuber. Tikelt-a d tajmilt i yiwet n tmeṭṭut taqbaylit yesfran aṭas di tudert-is, tagi d Nna Rreḥma u Ɛisa, n taddart n Tiɣilt-Mexluf n udewwar n Yiɣrem, yeddren di tallit n nnfaq n urumi. Nna Rreḥma tlul gar 1830 d 1835, temmut deg useggas 1951. Tessefra ɣef waṭas n yisental di tudert-is. Sawlen-as At taddart jida Rremḥa imi tella d lqibla n taddart-is. Ilmend n temlilit-agi « Itri adelsan » n Uqbu, ihegga-d yiwen n wahil n leqdic d amerkanti. Di tazwara, ad d-yili usenɛet n yiwen n usaru i yexdem Azru Muḥend Aεrab ɣet tudert n Nna Rreḥma. Am wakken daɣen ara yilin 3 yisaragen ara d-fken kra yiselmaden n tesdawit ɣef lesnaf n tmedyazt : Muḥend Akli Salḥi d Muḥamed Jellawi akked Helwan Aḥsen. Ad tili temzizelt n tmedyazt d temzikniyin akked tceqqufin n umezgun.
B. B.