D inelmaden n uɣerbaz “Tafsut” n temdint n Tizi-Wezzu i yewwin aseggas-a (2009) arraz amezwaru di temsizwert n uxxam Louis-Guilloux i yettilin yal aseggas di tmurt n Fransa. Inelmaden n uɣerbaz-a kkin s yiwet n tullist i d-heggan gar-asen ; d agraw s lmendad n tselmadt-nsen Massa Nazef. Asentel n tira yewwi-d ɣef tallit taberkant ideg tedder tmurt n Lezzayer deg yiseggasen n 1990. Inelmaden beggnen-d leḥris yettilin, s kra tiktiwin i d-wwin yemdanen imṭurfa, ɣef leqraya n teḥdayin. Hedren-d diɣ ɣef wassaɣen igerrzen i tesεa tmetti d uɣerbaz imi imdanen ur brin ara i ṭṭbel deg waman ; kemmlen, xas s lxuf, di leεwayed-nsen.
Ma d iswi n temsizwert, εlaḥsab n tselwayt n uaxxam-a Annick Le Chanu : « Ad nessiḥmel i warrac tira, am wakken daɣen ad issinen idlisen n Louis-Guillons, imi asentel yettawi-d yal tikelt ɣef yiwen n uḍris n umyaru-a ».
Di temsizwert-a, zyada ɣef warrac n tmurt n Fransa, ttilin-d wid n tmura-nniḍen : Lezzayer, Lalman, Likwatur, atg.
I usmekti, ayagi yeḍra-d s yibeddi n tnemhalt n uɣerbaz Tafsut Massa Chabane ɣer tama yinelmaden imi d nettat i ixelṣen ugar n 5000DA iwakken ad yaweḍ leqdic-a ɣer yifassen n tesqamut yettwakelfen s temsizwert-a.
Lhocine Ourezki
