« Ulac lgirra yeṣfan ; ttilint-d tucḍiwin, acu kan ur nexdim ara tamḥeqranit ». Awalen-a ad ten-naf deg udlis i yura Hamou Amirouche iwumi isemma : Akfadou, un an avec le colonel Amirouche, casbah-éditions, 2009. Adlis i d-yettbanen am wakken d tameddurt n Ɛmiruc diɣ d adlis n umezruy, yessekfel-d yis-s, umyaru, aṭas n temsalt i yellan ttwaεelqent ; yal yiwen akken tent-id-yettawi, yal yiwen akken ffɣent fell-as. D tikelt tamezwarut anda win yuran ɣef tmurt n Leqbayel d aqbayli, d win yellan di tallit-nni, d win yesteqsan amezruy s wudem usnan ; amur ameqqran di tira, d inigan n lweqt-nni i t-id-yennan yerna s « ttbut ».
Win ara yeɣren adlis-a, yezmer ahat ad yaf tiririt ɣef waṭas n yisteqsiyen i t-iceɣben ladɣa tamsalt n tmuɣliwin di tiddin n tegrawla, neɣ uguren gar wid yellan daxel d wid yellan akin i tlisa.
Dɣa ɣef wid yellan akin i tlisa, yenna-d Hamou Amirouche d akken asmi nɣan Ɛmiruc yella i teddu ɣer Tunes netta d Si Lḥuwas akken ad asen-d-inin yimḍebbren n din d acu n sebba imi daxel terwi nutni di 30 000 yid-sen rran-tt i yiɣimi ?
Am wakken yewwi-d awal diɣ ɣef unejmuε-nni nsen di Qsenṭina (llan di 4, Si El Hadj Lekhdar, Si Mḥemmed, Si El Lḥuwas d Si Ɛmiruc) anda Ali Kafi ur yeḥdir ara, xas akken d netta i d imḍebber n Lwilaya II. « Meḥsub xedmen timlilit deg uxxam-is netta ulac-it », i d-yenna umyaru. Ma ɣef wayen yeεnan tamsalt n « la Bleuite » anda yettwathem Ɛmiruc mi tefra lgerra s tmenɣiwt n waṭas yimdanen, yenna-d Hamou Amirouche, lecɣal-a akk ttwaheggan-d sɣur srabes n Fransa i d-ixelqen akukru gar Lwilaya III d Lwilaya IV. Di tallit-nni, imjuhad ur sεin ara lḥebs uɣur ara rren wid cukken d ixabiten ard tḥeqqen fell-as ; ihi mi cukken deg yiwen, ḥala lmut i t-yerjan.
Taluft n Lwilaya I, mi yemmut Ben Bulɛid d tin yefra diɣ Ɛmiruc. Taluft yettwasnen s Aures/Nememchas.
Ma i wid i as-yeqqaren dakken Ɛmiruc ur iḥemmel ara wid yeɣran, amyaru n Akfadou, un an avec le colonel Amirouche, yesmekta-d belli d Ɛmiruc s timmad-is i iceyyεen inelmaden ɣer Tunes akken ad kemmlen leqraya, u iweṣṣa ad d-yettwaxleq din uxxam n yinelmaden.
Lhocine Ourezki