Am yal aseggas, lixsas deg ttawilat n usiweḍ n warrac i yeqqaren d win i d-yettuɣalen deg tɣiwant n Ɛin Zawiya. Inelmaden n taddart n Bumehni i yeqqaren deg tesnawit n Ddreɛ-Lmizan, beggnen-d lɣiḍ-nsen zdat wugur-agi n ttawilat n usiweḍ.
Deg wussan yezrin nnejmaɛen zdat lemqer n tɣiwant, sawḍen almi ɣelqen tiwwura tɣiwant n Ɛin Zawiya. Isnawiyen-agi usan-d seg 12 tamiwin yemxalafen deg taddart n Bumehni, uznen yiwet n tebrat i uqerruy n tɣiwant anida i d-sbegnen leɛtab-nsen n yal ass akken ad awḍen ɣer tsenawit. Ar tura, kra ur d-iban i yinelmaden i iqesden yal ass iɣerbazen-nsen ama d ageffur ama d azɣal. Ad d-nerr lwelha belli lwilaya n Tizi-Wezzu d tin i yesɛan lixsas meqqren deg uḥric n usiweḍ n yinelmaden s wazal n 221 lkiran, s wakka ala aḥric-agi d win iteddun ala s wazal n 50% n ttawilat i as-ilaqen.
Dalila I