Aniwa i k-yennan ad d-yaweḍ wass ideg ara ddukklen yizzayriyen am yiwen n umdan mgal tikkerkas n ugdud Aɛrab Amasri ? Ttuɣun medden, teddun deg yizenqan, qqaren: nekni d Izzayriyen ! D ta i nettraǧu acḥal aya. Yuɣal wasif ɣer lḥedd-is, msalaḥen yemdanen d umezruy-nsen. Akka i tella,iI tebɣud tiɣzifed ay iḍ,; d ulaqrar ad yali wass. Ddan Yimasriyen almi d-nnan d akken lukan mačči d nutni, ur nettissin ara taɛrabt. D awal s wazal-is, imi beggnen-d diɣen belli tamurt-agi ur telli ara d taɛrabt, teldi kan tiwwura-s i wid d-yusan glan-d yid-sen ddin. Simmal ttmeslayen-d At yisnedyaq n lkif, simmal ssekfalen-d tidet idergen acḥal d leqrun aya. Aniwi iɣef tezzi teswiɛt di tedyant-a ? D wid i aɣ-isneṭḍen tagmat n lḥif ur nenfiɛ ur nessufuɣ si ddiq. D at tmira! Ayen akk yedran, awal ur ten-id-yuli. Atas i wwin d awal tadyant n Leqbayel iwumi sbabben beṭṭu n tmurt. Yak tura, banen-d. Leqbayel ruḥen ula ɣer Ssudan, ddan deffir tarbaɛt-nsen, bedden ɣer nnif d tmurt n Lezzayer acku adar yettabaɛ aẓar. Di leɛmer n Uqbayli ad yerǧu amek ara d-yeftu Lqerdawi di tedyant yeɛnan tamurt. Yeẓra-t mačči d gma-s. Ad nmuqel kan ass-a, widak-nni yesmuzegguten I “umusnaw-agi”, zedren di tsusmi, ur ufin amek ara qablen taswiɛt. Ma d wid iwumi yesfa uɛerqub, refden iqerra nsen, yezdi lqed nsen, ur ugaden lkumisir.
M. Smail