I lmend n usfugel n wass agraɣlan n yimeɛḍar, i d-yettilin yal aseggas deg 3 deg waggur n duǧember, tiddukkla timettit “Timetti” n lwilaya n Tizi Uzzu, thegga-d ahil d amerkanti deg uxxam n yilmeẓyen n Friḥa. Leqdic-agi, yella-d letnayen-nni yezrin 4 deg waggur-agi i deg-i nella, sɣur tiddukkla-agi akked Usqamu aɣerfan aɣiwan n Friḥa. Deg tsebḥit n wass, yella-d usterḥeb n yinebgawen n lɛez d lḥerma akked ddeqs n yimeɛḍar d yimawlan-nsen, d yimdanen yenxeṣṣen. Syin, yefka-d awal n tazwara uselway n tiddukkla-agi Mass Arezqi Ferḥat, i sferḥen aṭas yimeɛḍar-agi s tebɣest-nsen akked teflest-nsen, d wamek ttaken afud i tudert-nsen. Am wakken daɣen i icekker aṭas aselway n tɣiwant n Friḥa Mass Azizi Muḥend, ula d netta yeḥḍer deg tmeɣra-agi, dɣa yefka-d awal-is ideg yerra tajmilt i yimeɛḍar-agi akked yiɛeggalen n tiddukkla-agi. Syin, ɣer-s yella-d ufraq n wazal n 20 n warrazen i yimeɛḍar-agi n temnaḍin yemxalafen n lwilaya n Tizi Uzzu, deg tegnatin n lferḥ akked tumert, dayen i d-ibannen ɣef wudmawen-nsen imiren-nni. Sḥersen yiɛeggalen i iqeddcen deg tiddukkla-agi deg umeslay-nsen ɣef temsalt-agi, gar-asen Massa Wiza At Ɣerbi, dɣa gren-d tiɣri i yimdanen i wakken ad asen-d-fken afus n tallelt swayes ara ɛiwnen imeɛḍuren d yimdanen yenxaṣṣen. Ad nesmekti kan belli, tiddukkla-agi “Timetti”, ulamma melmi kan i d-tlul, maca tebda yakkan leqdicat imettiyen. Dɣa deg waggur-nni n remḍan i iɛeddan, ferqen azal n 50 n tkerrusin neɣ n tcariḍin i yimeɛḍar-agi. Syin akkin deg tmeɣra-nniḍen fkan-asen iselsa d iceṭṭiḍen i d-yettunefken sɣur yimdanen-nniḍen.
Ghani Amazigh