Am yal aseggas, yesmekta-d umaḍal 3 deg duǧember-a ass agraɣlan n yimeɛḍar. D tagnit dɣa akken ad ttnernayen yizerfan n tecriḥt-a n tmetti, ad ttafen yettishil uzday-nsen inmetti. Deg tmurt n Lezzayer, mačči deg liḥala igerrzen i yettidir umeɛḍur s umata, seg wakken d adday ayendin uẓayer i asen-yefka uwanek.
D ameslay, tazwara ɣef uɣrud (pension) amayyur i d-ttawin, i yeqqimen deg 4000 n yidinaren seg wacḥal tura d aseggas, ulamma tbeddel teɣlayt n tudert, bedlent tegnatin daɣen. Seg tama n unabaḍ, ad d-yeffeɣ kra n wawal i kra n wussan zun a-t-an lqidar n uɣrud-a ad yernu, sakkin ad tettwattu taluft.
Am wawal n Massa Muniya Meslem, taneɣlaft n temsetlelt, deg umaṭṭaf aɣelnaw aseggas n 2014. Ass-nni tenna-d: « Aɣrud n umeɛḍur, ad iɛeddi seg 4000 ɣer 8000 n yidinaren ». Kraḍ n yiseggasen, zrin seg yimir-nni, mazal yeṭṭef uwanek deg ustehzi-ines ɣef yimdanen-a at asrayen uzzigen. Ula d takerḍa tamaynut n umeɛḍur, tella tetturaǧu i lmend n waya deg 2016, maca ṭṭsen waman d isɣaren.
Seg tama-nniḍen, ttmagaren-d yimdanen-a ugur d ameqqran iɣef ulac aṭas n umeslay: wa d ugur n unekcum (accessibilité). D ayen i yeǧǧan addad-nsen a-t-an deg yir liḥala deg tmurt-nsen. Ulamma aṭas-aya segmi i d-ffɣen yisuḍaf i yettḥettimen ɣef wid ibennun ad gen ttawil n uɛeddi i umeɛḍur, abeɛda mi ara yilint tebnayin-nni d ayla n baylek, akka am tɣiwant, tasreqqest, tazeqqa n udawi, axxam n yilemẓiyen, anammas adelsan, amezgun, ssinima, taɣsert, atg. Wanag mazal ar ass-a ixuss unekcum i umeɛḍur, neɣ ulac-it yakk tikwal. « S anda ma rriɣ ur ttafeɣ anekcum akken i d-yeqqar usaḍuf. Ula d amḍiq i yemmugen i tceryulin deg uneḥbus n tkeryas n Tezmalt, ufiɣ kran-t i wid yeznuzuyen uẓẓim d lqahwa ».
D awal n yiwen n umiyupat seg tezmalt. I d-yernan: « ula d tumnayt deg tmacint, yak yeqqar-d usaḍuf aql-itt baṭṭel i yak imeɛḍar. Maca wid ixeddmen deg tmacint ttḥettimen-iyi ad xellseɣ. Ɣas ad asen-sekneɣ takerḍa n umeɛḍur, ad iyi-d-afen ssebba akka d wakka». Yir addad-a n yimeɛḍar, d tilawt s anda ma terriḍ deg tmurt n Lezzayer. Maca wid i teɛna taluft sɛuẓẓugen, ayyuren d yiseggasen ttɛeddin war abeddel.
M. K.