D asentel agejdan n tqacuct n Copenhague γef uneẓwu(climat)
Seg ass n letnayen yezrin i tebda tqacuct i d-ijemεen immetlen n 192 n tmura n ddunit di temdint n Copenhague(Danmark)akken ad mmeslayen γef wuguren i tettmagar tewnaḍt.Anejmuε-a ara yekfun deg ass n 18 duǧember ideg nella,yegla-d s usenqed n waṭas n yidisan seg wid i iqedcen deg uḥareb γef tewnaḍt;ladγa aṭas n tikliwin d tmesbaniyin i d- yellan deg kra n temdinin n tmura n Lurup,ideg ssutren wid i tent-id-yesudsen »akken timura timeqqranin, ad d-afent tifrat s lεejlan i wugur n unerni n lgaz co2 di tewnaḍt ».Attekki n uselway n Marikan Obama di temlilit-a,aṭas daγen umi d-yerra assirem,imi tamurt-is tettusemma d tin i yesluγuyen agama s waṭas imi teεa ddeqs n lluzinat i d yettaken iεeqqaren n ccimik yeswaγayen tawnaḍt.Akken ad nesmekti,ugur ameqran i d-ttsebbiben lgazat-a n diri ladγa co2,d anerni n leḥmu n lqaεa i d-yettawin abeddel n uneẓwu.S wakka lwelha akk n umaḍal ass-a terra γer yigemmaḍ n tqacuct-a,ladγa imi Obama yefka-d kra n swab xir n George Bush i yugin di lεehd-is ad yesteεref s umihi(danger) i s-tezmer ad teglu twaγit-a n tewnaḍt.
Mokrane Chikhi