Lynda Chouiten, d tamarut tilemẓit i d-yufraren s tira-s iseggasen-agi ineggura. Tewwi arraz Assia Djebbar 2019 n wungal-is « Une Valse ». Ha-t-an d acu i aɣ-d-tenna ɣef wass agraɣlan n tmeṭṭut. ‘’i lmend n 8 deg meɣres, ilaq ad d-nesmekti mačči d tameɣra, maca d asfugel n umennuɣ n tlawin ɣef yizerfan-nsent. Amennuɣ mazal ur yemmid ara, llant aṭas n tɣawsiwin i ilaqen ad beddlent deg ddunit ; mazal tettili-d tneḥyaft gar urgaz d tmeṭṭut. Mazal ttidirent tlawin tamḥeqqranit akked temdellit seg yal tama. Ɣur-neɣ, ula d tid-ak yeɣran neɣ tid i izemren i yiman-nsent seg tama n tedrimt, mazal-itent s ddaw n tecḍadt n urgaz, ama d baba-s, gma-s neɣ d argaz-is…atg. Mazal d nutni ara iḍebbren ɣef wayen ara lsent d wanda ara ruḥent.
Meḥsub ɣef wamek ara tili tudert-nsent. D lewhayem, mazal ar tura nettmeslay ɣef tmeṭṭut am wakken kan d tayemmat, d tameṭṭut n urgaz, d yelli-s, d uletma-s, am wakken ur tesɛi ara tudert-is i nettat kan, s timmad-is. Ttwalin kan assaɣ yellan gar-s akked urgaz, tella kan i lmend n waya. Aṭas n tɣawsiwin-nniḍen i ilaq ad d-ttwabdarent, aṭas i mazal ad yettwaxdem, ama seg tama n uṣaduf neɣ n lɛaqilyat. Limmer d lebɣi ur yettili ara ass n 8 deg meɣres, d ass n ucebbeḥ akked ccḍeḥ, syin ad tuɣal tmeṭṭut ɣer tkuzint akked meḥyaf. Ilaq ad yili 8 deg meɣres, d ttiɛad i wakken ad d-nesmekti d akken mazal ɣezzif umecwar’’.
H. M.