Deg awal-is yenna umyaru atalyani Pierre Paolo Pasolini : « udem ara yesεu umezgun d udem ur nelli ara d win n umezgun ». Meḥsub ilaq tamzgunt ad d-tefk anzi ɣer tilawt amzun akken wid yettawalin taceqquft ad hulfun s yiman-nsen ttwanecden ad muqlen ɣer lemri n tudert deg llan, mačči di tzeqqa n umezgun iten-yuɣ lḥal.
Deg anect-agi ad d-naf taceqquft i d-tesuli tarbaεt n Tcemlit n tidukkla tadlsant Yusef Uqasi, d tin yuɣen abrid-agi i yettaǧǧan amdan ad iḥus s yiman-is yekcem deg urar n tmezgunt, yedda deg telqay-ines, yemǧaza akked d tedyanin i d-tesrus zdat wallen-is, yemεebber akked d tuttriwin i d-uzan i wallaɣ-is.
Akka tikwal anaẓur ikeččem tirga leqqayen akken ad yazen tibratin seg at laxart, amer wid yeddren ad rren lbal i lhem id as-yenḍen si yal tama, d lḥif deg ttexnunusen di yal lawan.
Kra yellan, yebda asmi d yuffa Muḥ n Muh tiɣemmar n tẓuri d tilmawin. Ur yelli ḥedd deg umḍiq-is. Mgal lwehc d tlam d uṣemmiḍ n wuḍan, n tebrek war tafat, s ifaden n teftilt n lebɣ-is, ad yekker akken ad inadi ɣef imawlan n tẓuri anda akka llan, anwa lbir i ten-yeččan? Deg ubrid-is ad yemderkal ɣef tɣawsa yerdem wakal akked d lawan. Muḥ n Muḥ a d-yeskfel ayen-nni, ziɣ d allalen n tẓuri ayen din. Asmi ara yer yal taɣawsa ɣer umḍiq-is, ad d-yini awal ara yilin yecba anza, uqbel a d-texḍef tmetant ula d netta.
Maca, xas iruḥ yiwen ad yass wayeḍ akken ad d-yesekfel ayen yebɣa ad yeɣbu lawan. Akka dɣa ula d “ Hocine” yellan d amyaru ad yemderkel ula d netta di lǧera n tikli-s ɣef lɣessa n Muḥ n Muḥ,; tiɣri n umejed a d thuz igenwen, lqedra ad tter tiɣri, a d-yezzi Muḥ n Muḥ ɣer tudert! At tẓuri werǧin uysen lewqel xas ulama lweεd iteqqes! Talit kan, reḥba tuɣal teεmer s ifananen i d-yezzin seg yimi n tatut.
Maca isteqsiyen gten : anwa yerran idles d tmusni di tcerket? Anwa yerran anaẓur yettwaεzel? Anwa yugaden tikti-s? Amek i d amek n timsεraq-agi? D wa i d asental n tcequft “ Mazal lxir ɣer zdat” i d-yessukkes Mass Noredine Ait Slimane seg yisefra n Muḥya, taceqquft yesuli Mass Hamid A. S.
Deg tdiwwenit ara d yilin ger Muh N Muḥ ( Noredine) akked d umyaru( Ait Gueni Said Hocine) ara d-ḍefren deg urar : Igherousene Mansour, Zenia Brahim, Saidi M’hend, a d-yezrireg zdat-neɣ umezruy n tmurt deg isegasen n tmayin asmi s wudem n tkerkas akked lbaṭel yuɣal ufanan di rrif, d war azal d war awal. Yettrifig di bal n yal yiwen ara iwalin tamezgunt-agi laxyal n Slimane Azem, Kateb Yacine, Mouloud Mammerin, Matoub Lounes, Lounis Ait Menguellet, Ferhat Imazighen Imoula …d waṭas n ifanan i wumi yettwegzem wawal.
Deg tacquft -agi isenden ɣef ljehd n wawal akked d telqay n izamulen, asefru yuɣ azal meqren, d netta i d imzuɣer n wid yettawalin akken ad awḍen ɣer yiwen yiswi: tuɣalin n yidles ɣer umkan-is. Yettban d tiɣri n tmezgunt-agi yezdin urfan akked d usirem d akken : ma din teɣba tẓuri, teɣba tmusni, teɣba tlelli n umeslay d awezɣi a d taf tmeti ixef-is naɣ tamurt iman-is. D at teskla akked d lfen d tmusni i d-imwelhen n ugdud ɣer tafat, daymi ilaq asen-ǧǧen abrid i uεeddi, akken am yiṭj ad sefḍen tlam ɣef wallen n yal yiwen. “Ma yella neseweḍ tiɣri-agi ɣer ul n yemdanen, ma nefhem belli ala iberdan-agi i yessufuɣen ɣer tignatin n liser, ad yili newweḍ lebɣi-neɣ nig n wayen i nesarem! “ i aɣ-d-yenna deg awal-is Mass Noredine yellan deffir n tcequft-agi.
Ait Slimane hamid