Kra tekka temsikent n la Fondation Matoub Lounes deg uxxam n yidles Mulud Mεemmri ddurt iεeddan, awal itezzi γef unegzum n trisiti deg uxxam n Matoub. « Amek teğğam ad taweḍ temsalt ad tegzem Sonelgaz trisiti i uxxam n Lounes ? Acuγer ur txelṣem ara tafaṭurt-nni kunwi s la Fondation ? » D wigi i d isteqsiyen n yilmeẓyen i d-yettuγalen yal tikkelt i yimḍebbren n la Fondation.
Nebγa ad nẓer ugar γef temsalt-a, nesteqsa amaru amatu n la Fondation yenna-d : « d tidet, gezmen-as trisiti i uxxam n Matoub di tazwara n useggas-agi, acu kan, kra n wussan kan nerra-tt-id. » Si tama-nniḍen, εlaḥsab n wayen i aγ-d-nnan dakken d yemma-s n Matoub i yugin ad txelleṣ. « Tenna-d ttxelliseγ 8 n yixeddamen n la Fondation, ur zmireγ ara ad rnuγ ad xelseγ trisiti. » i d-yenna yiwen n yilemẓi n At Dwala iqerben mliḥ tawacult n Matoub. Mi iruḥ uxeddam-nni, i tikelt tamezwarut, ad yegzem trisiti, yufa d axxam n Matoub dγa yerra-tt i yimeṭṭi, yugi ad tt-yegzem…
Lhocine Ourezki