Ma yella zik amur ameqran n wayen i iɛaben deg wedles d aḥric n d tamedyazt yernu s udem amawi, deg isegassen-agi ineggura tenfal tira ɣer udmawen nniḍen n tmena, imi ungalen d tullisin bdan ttlalen-d s ddaw leqlam n yimyura wa deffir wa. Anebdu ‑agi yezrin, yefɣed sɣur tizrigin Baɣdadi yiwen n wamud n tullisin yura Mass Saɛid Chemakh ddaw yiwet n tansa : Gar zik d tura.
Amud‑agi deg llant tesɛa n tullisin akked setta n yedrisen ufriḍen, yettwanesxen s yiwen uɣanib yettmudun lebɣi ɣer taɣuri ‑nsen, acku timsal ɣef ayeg i d yewwi d ‑ timsal yettḥazen amdan deg ixef‑ines ; Ger zik d tura d adlis d yesfruruyen tilufa n temeddurt, yettra‑tent‑id am lemri zdat n wallen‑nneɣ akken ad aten‑t ɛabber, aten‑t nektil, aten‑t nesewzen di lmizan n tidmi ‑nneɣ, amer tifrat i tuttriwin inebccen di lbal, ad sen‑t id nnef tawwurt.
Ger Zik d tura, d tiqṣidin n yal ass i‑izemren ad ḍrun‑t di yal tama di yal lawan.. I yal yiwen seg‑nneɣ. D tiqṣiḍin n yemdanen am nekk am kunwi, i d‑yekkren deg yirebbi n timeti‑nneɣ. D tiqṣidin anida yal yiwen ad yeɛqel iman‑is deg‑sent acku uzlent ɣef lkaɣeḍ s leqlam d yewwin tikta deg ayen I d ‑yenulfan naɣ I d‑yettnulfun yal‑ass. Saɛd CCemmax yewwid tugniwin n wayen i d‑nettmager di tudert‑nneɣ, yesrezfeɣ ɣer telqay n tudert deg tudrin n tmurt n Leqbayel yeɛlulqen ɣef tuyat n wadar werǧin yeffiɣ lhem akked d ddel. Maca xas akken idrisen yellan deg amud‑agi ur ddurin ara tecmet n tadyanin ɣef ayeg mderkalen yemdanen, tira s awcu uran tugmmed seg uɣabalu n leḥmala, imi Saɛd CCemmax ur iccuḥ ara s tayri yekseb ɣer ljiha n idurar. Idurar deg nnif yettemɛaber d kennu, deg lɛaz yettnamarit ddel, deg isaɣ yettucebbel s txasarin, deg addud yettilid d ɣeluy. Iduara deg ṣsber tikwal d ddwa n tlufa, deg nmara d abrid ɣer tnekra, deg tamara d ussu n lehna. Idurar deg aluy yeqqen ɣer trusi, deg tehari d tewlijt n diq, deg telqaq d takniwt n tewser, deg tumert d tarbibit le leḥzen, deg lehna tettlaled s cwal am waken id as yenna umedyaz deg awal‑is: Imesdurar n twaɣit, tawaɣit tezzi‑assen!
Melba cekk adlis ‑agi yewwid ameynut ɣer tesekla taqbaylit, d aẓru iṣeḥen ɣef ayeg ara yers uɣaled n tira ara d illalen deg imal i d‑iteddun. D tullisin ara yeɣer umdan s tuget n lferḥ acku taqbaylit s wacu uran‑t d tin wuɣur iweɛa yal yiwen, d tin yaszalen amyeg n Si Muḥend U Mḥend s lxefa, aya meṛṛa d ayen ara yeǧǧen,mebɣir ccek, inelmaden n teqbaylit yella w acu ara d‑affen d aɣanib, d telɣa akken ad neǧren ula d nitini leqlam‑nsen deg ubrid n tira yettawin tutlayt ɣer zdat, imi ala s tira i‑yettili wadud n tɣermiwin!
Ait Slimane Hamid