Haca kan i tekfa tmeγra n lεid tameqqrant,tuget n yimezdaγ n tmurt n Leqbayel bdan ajmaε n uzemmur.Yuγ lḥal weqbel,aṭas n tudrin d leεrac ideg weqmen « tamuqint » akken ad neqsen yimukar d yimḥiwac.Di ddurt tamezwarut mbeεd lεid i bdan yimdanen ttezririgen γer yizuγar,yal tawacult teddun akk yiεeggalen-is ladγa deg ussan n usteεfu ideg ur qqaren ara warrac ;aya imi imeqranen qqaren : « Azemmur yettuḥwağ lemεina » ;taswiεin ttemεebbaren warrac anwa ara d-ileqḍen aṭas n yiεeqqayen di lqaεa.Mi nelḥa deg uzaγar n leğiha n Ssumam,nesla i wid i yettberriḥen i warrac-a ittekkan deg temzizelt.Win i d-yeččuren lḥila-s d aneggaru ttqejjimen-t,ttcabin-t γer tγawsa n diri,akken ad yesεu leḥrara ad yelqeḍ aṭas, ma d win d-yufrarin d amezwaru ad yefreḥ s ugemmuḍ-is.
Aseggas-a γas ma yurew uzemmur,maca ad txas lγella s sseba n tmes i yeččan aṭas n yigeṭṭaren deg unebdu yezrin,aya yegla-d s tmerna n ssuma n llitra n zzit i yettnuzen akka tura ger 400Da d 500DA.Ahat ad tader mi ara yekfu yiẓid n lγella n useggas-a.Seg tura γer yimiren imdanen ttmennin ad gten wussan n yiṭi d takewt akken ad εijlen deg ujmaε n uzemmur-nsen weqbel ma teṭṭef-iten tegrest.
Mokrane Chikhi