Amddakel, ammud n tullisin n Muṛad Zimu.Yeffeɣ-d ɣer tezrigin Tira, ass n 27 di tuber iɛeddan.
Deg yiɛezzugen neɣ di lɣerba, di tesdawit neɣ di tmura, s teqbaylit heddren ak medden i yura Zimu Muṛad, amyaru, acennay, amedyaz, amud n tullisin « Amdakel ».Yura ɣef wid tečča lɣerba n tmura almi sweḥlen iman-nnsen deg umerḍax. Amdakel, d tamuɣli n Zimu ɣef Zwina, at lbaḍna, tinna akken inudan rrif, ur tt-qbilen imawlan-is, ur tt-qbilen lecyax-is mafaɣ a tkemmel tisselbi ! Amdakel, d tira ɣef tiɛɛiqert yeǧǧan acḥal d tiwaculin ttidirent s tmara, ur mqefraqent, ur ddirent akken ilaq.Yelha ṣṣber maɛna igellu s lbenna n wussan, igellu s leqder d wayen i ɣ-yellan deg ul.Tella Zwina i lbaḍna, i tukksa lxiq, maɛna Zwinna yeččur wul-is almi yegla s yixef-is.Tenɣa iman-is, truḥ d asfel, tewwi labḍna, tewwi tiɛewji n weqbayli ur nessin ad yili s idis n warraw-is. Xelfen-tt-id Hamid d Saɛdiyya, maɛna almi ṛzaget teswiɛt…
Amdakel, si ccna ɣer tira, d aḥrun n Muṛad Zimu ɣef tdukli, ɣef teqbaylit, d asmekti n yeḥbiben, d asmekti n Lynda ḥemmlen di sin, am netta am Ḥsen almi qrib tegla s tdukli-nnsen ! Fkan d asfel ad tidir tdukli-nnsen..
Amdakel, d tuɣalin ɣer wussan n tesdawit, ɣer liḥala n litidyu, di tizi n wass-a. D tuɣalin ɣer tɛewji n weqbayli, ɣer usmmuzzeɣ-nni yesmuzzuɣ anda akken ur ilaq; Ɣer wasif yekkan gar wid yeɣran d wat zik, ɣer wid yettun ula d tajaddit.Amdakel, d akaṛni azeggaɣ, tezweɣ idammen-nni yessazzal imi akken ara fken icufuṛen taṛwiḥt-nnsen d asfel, ur ḥsin ad ddren neɣ ad teglu yis-sen.Ma ddren, rebḥen-d cwiṭ n yedrimen, ma mmuten ad ṛuḥen am tadla yečča yilef. Amdakel, deg-s xemsa tullisin banent: Amerḍax, amdakel, Zwina, akaṛni azeggaɣ d litidyu.Litidyu tebḍa d iḥricen: yeɣra meskin, imaziɣen, a neṛṛez wala ad neknu, anwa I d abrid ay abrid?, yella yiwen yella ulac-it, yettmeslay kan I waḍu, nous ne sommes pas des arabes.
Muṛad Zimu, d acennay d amyaru.Ilul deg Ucallam, di tmurt n leqbayel.Yeɣra tussna n tmetti di Lezzayer tamannaɣt.Sakin, ikemmle leqraya-s n Magister di tutlayt d ydles amaziɣ, di Tizi Wezzu. Yessufeɣ-d ddeqs isidiyen: “ ijeǧǧigen n tsusmi” di 1997;Slupri, di 2001; Maɛlic tant-pis, di 2004 ; apipri kan, di 2007.Yura yakan ammud n tullisin “Tikli” I d-iffɣen ɣer wesqamu unnig n timmuzɣa H.C.A. di 2004.Yexdem rebɛa n iseggasen di ṛṛadyu tis snat.Tikelt-agi, di 2010, yessufeɣ-d ammud n tullisin “Amdakel” ɣer tezrigin Tira
Zira