Tisuqas n yiseggasen. Isufa reqqen ttaẓen. Times tezga tecɛel, wa yesmendag-as, wa yettleddim-as-d isufa. At wadda d at ufella, am yiḍelli am wass-a, wa yeṭṭef taqacuct, wa yugad ad tt-yaweḍ, iḥuder iman-is ɣef trusi. Wa yekkat irgazen s wiyiḍ amer a t-id-iṣaḥ wemkan, amzun akken amkan-nni d lxali, win i as-yennan yexla i yexlan d iman-is ! Nessaked akin akka ma yella wayen ara ɣ-yeččaren tiṭ, ala tira d ccna i ɣ-dyettarran cwiṭ n ṛṛuḥ yal imi ara d-iḥder uneɣluy, yal imi ara nɣen tinekriwin n yemɣiden. Uuuuuuuuuh ay aḥbib ! Tanekra imi ara tt-id-nebder yettṛuḥ deg-naɣ nnefṣ, i nugad ala ameslay-agi i d-yeqqimen, iweqqeɛ-itt zemmem qemmem, ṭṭef imi-k susem : Cckal, rrebg, rriḥa n wussan n ẓẓmik, amek ara tefru ? Ayen nniḍen, kullec d aḥettet, kullec d tisigar.Wissen aseggas-agi ma ad as-necfu ? Wissen ma ad necfu ɣef tecṛaḍ iḍebɛen s idammen n imeẓyanen ? wissen ma ad necfu ɣef wid i ɣ-yerran takmamt, gezzren deg-naɣ nekni nettwali ? wissen ma neɛyu seg yiseflan, ad yeɛyu lhem, ad nbeddel tikli i teflukin yewwin acḥal d ilemẓi d asfel ? Wissen ma ad beddlen wussan n tesdawiyin, ad ɣren warrac, a nezdi lqed am nekni am medden ? Wissen ma ad aɣ-ǧǧen abrid a nɛeddi, ad teɛyu tmettant deg ucelqef n leṛwaḥ, a tibnin teswiɛt, fell-asen fell-aneɣ ? Wissen ma ad negren wid yessengaren tudert di tmurt-nneɣ ? Wissen ma ad d-nelli allen, ad nessiked ar zdat, ad nwali i ɣ-yeggunin si tsuqas n yiseggasen ? Wissen…? Ssya ar ass-n, aseggas amerbuḥ i medden meṛṛa !
Zira