Yettunefk waraz amezwaru i Khettabi Hmed(Tizi Wezzu),araz wis sin i Benhamouche Fares(Bgayet) ma d wis tlata i Younsi Mouloud(Sṭif).
Azal n 60 n yimedyazen i yettekkan di teẓrigt tis rebεa n temlilit n tmedyazt n Ssumam i d-tessudes tdukla n Yitri Adelsan n Uqbu seg ass n 23 ar 26 dujember 2010.Nnig n temzizelt n tmedyazt i d-yellan kra tekka temlilit,llan-d yisaragen anda i d-wwin awal yimusnawen γef tlata n yimedyazen mucaεen n talsa i yessefran γef usentel n tayri :Si Muḥend Umḥend iγef d-yemmeslay Abdenour Abdeslam deg usarag umi isemma « inaw n tayri deg tmedyazt taqbaylit » ;Nezzar Qebbani iγef d-yemmeslay Naaman Aziz ;Charles Baudelaire iγef d-yewwi awal usdawan Halouane Hassan.Di temlilit-a daγen,tella-d zyara n uẓekka n umeγnas n tmaziγt Muḥemmed Uharun yellan di taddart-is Tifrit(taγiwant n Uqbu). Deg ass aneggaru n temlilit,ttiεad yella-d deg tzeqqa n ulamas adelsan Abderrahmane Fares i iεemren s yinebgawen n tdukla d yimezdaγ n Uqbu.Qbel ad terr tesqamut n yinzurfa igemmaḍ n temzizelt n tmedyazt i ttrajun yimekkiyen s ccuq,Na Feṭṭa(seg terbaεt urar n lxalat) d umusiqi Said Bouchrit wwin-d acewwiq n Na Crifa « bqa εla xir ay Aqbu » i d-yesmektan inebgawen γef tnaẓurt-a tameqrant.
Mbeεd mi d-tekcef tesqamut n yinzurfa γef uqerruy-is amyaru amaziγ mass Boualam Messouci ideg yella daγen umyaru mass Malek Houd d uselmad n tmaziγt mass Zebouji,d tamsiwin Oulebcir d Hamoudi tiselmadin n tsekla tamaziγt di tesdawit n Bgayet ; yettunefk waraz amezwaru i Khettabi Hmed(Tizi Wezzu),araz wis sin i Benhamouche Fares(Bgayet) ma d wis tlata i Younsi Mouloud(Sṭif).
Am wakken daγen i yettunefk waraz n tsuqilt i Mihadi Rabah d waraz n tmedyazt yufraren n tlawin i Amor Dahbia(Lezzayer Tamanaγt).Ttunefken daγen warazen n usebγes ladγa i yimekkiyen n lwilayat n berra i tmurt n Leqayel,i ten-yewwin d :Mihous Amar d Mohamdi Khieredine seg lwilaya n Tbatent,Sahraoui Abdelouahab seg Waregla umi tefka daγen Na Taklit(yiwet n temγart seg Uqbu) tarzeft n tazert d zzit n uzemmur d tγenğawin n usγar d lehdiya seg tmurt n Leqbayel i yimaziγen n Wareğlen.Yettunefk-as daγen waraz n usebγes i yiwet n tlemẓit n temnaḍt n yisaḥliyen, ta d Aissou Aicha i d-yusan seg Weqqas.Am wakken daγen i fursen tagnit yiεeggalen n tdukla akken ad fken araz i umendid-nsen amaray amatu n tdukla mass Benaoudia Madjid ilmend n tuffγa-s n lantrit imi daγen yella d yiwen seg yimdukal n lmerḥum Σemmi Ssaεid(Said Maraoui) i yewwin isem n teẓrigt n useggas-a.Tawacult n lmerḥum teḥḍer i tmeγra-ya n taggara,mass Hakim Maraoui netta daγen d anaẓur yefreḥ s tejmilt-a i yas-yuγalen i baba-s i tt-yuklalen,imi di tudert-is yella d amedyaz,d amyaru d argaz n tsekla i iḥemmlen talsa.
Akka i tekfa temlilit n tmedyazt n Ssumam,imedyazen i d-yusan seg yal tama ferḥen imi sεeddan ussan yelhan di temdint n Uqbu anda i qamen yes-sen akken ilaq ama d imezdaγ neγ d iεeggalen n tdukla Itri Adelsan.Ineggura-ya weεden-aγ belli ttiεad n temlilit ad d-yezzi aseggas i d-iteddun u ad yili xir n wakka. Nebγa daγen ad nesseεlem imeγriyen-nne&gamma,;belli mi nella deg Uqbu deg ussan n tfaska aṭas i nemlal seg yimeγriyen n Uγmis n Yimaziγen.Aṭas seg-sen fkan-aγ-d tidmiwi-nsen ilmend n umuli wis sin n uγmis-nneγ ara yesεun sin n yiseggasen ass n 12 yennayer 2011.Tidmiwin-a ad tent-id-nseddu di teẓrigin-nneγ ara d-yasen.
Mokrane Chikhi