Iεedda zman-nni anda i as-qqaren i Tizi Wezzu ‘’La p’tite suisse ‘’. Tura ‘’tamurt tuγal d agudu, tettfuḥu…’’; yenṭeḍ-itt ujeğğiḍ si yal tama : si tama n wamus (iḍumman) neγ seg waṭṭan n tmetti ; yal lehlak ha-t-an din : tuksa n sser, tukerḍa, arrebrar, tamḥeqqranit, atg. Di taggara-a, ula d tikli di temdint n Tizi Wezzu ur tezmireḍ ara ad teḥluḍ. Iberdan n uḍar (trottoirs), ḥarran-ten At ‘’lbiε u cra’’ ; rran-ten d tiḥuna, ladγa wid-nni yesnuzun llebsa, armi uγalen yemdanen leḥḥun deg ubrid n ṭunubilat, anda teddiḍ d amdegger, d amqellaε. Yiwen ur yezmir ad d-yini aḥḥ, imi urεad ara t-id-tessufγeḍ teẓriḍ anda ara d-tuggriḍ. Deg ussan-agi yineggura, ula d imekwan n ubrid anda akken ḥebbsent tkeryas ṭṭfen-ten Wat lxeḍra d lfakya. Yendah wahraḥu. Imḍebren, am wid n lwilaya neγ wid n tγiwant, yiwen ur d-yelhi di temsalt-a, am wakken ur ten-teεni ara ; ad as-tiniḍ yeffeγ fell-asen waya. Akken i as-yenna Zedek:
A tidak akk deg-i nkeccem,
Amek armi i nger daxel-nsent?
Ma d nekni i tent-id-yettafen,
Neγ nutenti amek i aγ-d-ttafent?
Mi ara iwali umdan lecγal-a, ad yefhem, ahat, iwacuγer neqqen yilmeẓẓyen iman-nsen neγ acuγer ttaken tarwiḥt-nsen d asfel i yiselman. Anwa i d abrid a abrid ?
Hocine. M