Tagrawla n weblad

Partager

Wi yettun tagrawla n weblaḍ ? Amek ara tt-yettu ? Arrac-nneɣ ɛerbuzi, qublen rrṣaṣ n yiǧadaṛmiyen, mya u setta wɛecrin (126) d axalaf ṛuḥen d asfel.

D aɣurru, d aɣurru, d aɣurru … cfiiiiiiiiiiiiiiiiiiɣ am wass-a, deg uɣmis El Xabeṛ, yedda-d isalli amezwaru, nɣan Mas nnsen, s tefṛansist deg uɣmis taṣebḥit « Le Matin » yura-d « La Kabylie s’embrase », yura s uzeggaɣ, tezweɣ n yidammen n yimeɣrasen, n yelmeẓyen yuran Tilelli s idammen nnsen.

Am tefsut n 2001, tecɛel tmes di tmurt-nneɣ, d tanekra n yilmeẓyen: wa s weblaḍ, wa s rruda, wa s taɣect-is, wa s ṛṛuḥ-is … Acu kan di yal tanekra, keččmen-d ibuxuṣen, ixannaben, wid-nni yesluɣuyen amdun ssizdigen yilmeẓyen, kecmen-d at ujenwi yeḥfan, kecmen-d imakuren, wid yettṛuzun, wid yetthuddun, wid-nni ur nebɣi ara a terfed tmurt iman-is. Ajajiḥ n tmes yečča imdanen, uɣalen-d wussan n « tegrest Urɣu ». Din tenteḥ, din tegla s wayen ɣ-d-iṣaḥen s yizzayriyen, din rnan-as zzit i tmes. Aseggas-a, d zzit uzemmur i yṛexsen, tella lɣella, diɣ netta d tin kan i ylaqen i tmes, rnan-as-tt am wakken s-tt-rnan i tmes di 2001, am yal tafsut n tnekriwin, tceffu i tmurt n leqbayel, din Bgayet tuɣal d rrmim. Din tenteḥ, din texsi. Ula d isaffen qqquren, tili meqqar ad d-grin, xeṛsun, yeblaḍen n tegrawliwin! Akken kan texsi, nnunnten-d laɛrac. Anwa leɛrac? Maci d wid-nni iferrun tilla di tudrin d leɛrac, d wid-nni i wumi d-ssawalen ad nɣen tinekriwin n yemɣiden am wakken tt-nɣan ɛecra n iseggasen-aya. Laɛrac-nni yerran tamurt n leqbayel d tamurt n lxali, sersen-d rrihban, lxuf d tugdi, wdi-nni yezzenzen idammen n 126 d ilemẓi, ar ass-a, mazal yezdi lqedd-nnsen, uɣalen-d, am zun kra wer yeḍri. Nnan-d ad zzin meṛṛa i Lezzayer, ad d-ssaysen Tilelli! Anwa akka ara ten-yamnen? Anwa akka ara yeddun yid-sen? Win yebɣan Tilelli yaru-tt s idammen-is, win yebɣan Tikli yeddu ɣef uḍar-is d wid-nni kan i d at tegrawla n weblaḍ…

Zira

Partager