Fahem Djoudi, netta d yiwen seg yimedyazen i d-yufrarin di tfaskiwin n tmedyazt yettmagan di tmurt n Leqbayel. Yewwi araz wis tlata di tfaska n Udrar n Fad n useggas 2010, araz n usebγes di temlilit n tmedyazt n Ssumam 2010, yewwi-d daγen araz wis sin di temzizelt n tmedyazt n Wad Amizur deg useggas n 2009.
Aγmis n Yimaziγen : D acu-ten yisental iγef tessefrayeḍ ?
Fahem Doudi : Ttaruγ s waṭas γef yiγeblan i tettidir tmurt, d wayen yeɛnan tanefsit.
Anwi-ten yimedyazen imeqranen i tḥemleḍ ?
Llan aṭas, yal yiwen acu i d-yewwi i tutlayt, win iyi-iḥuzan s waṭas s tmedyazt-is akked ccna-ines d Meɛṭub Lwennas, llan daγen wiyaḍ am Lewnis ayt Mengellat, Muḥya d Zdak Mulud, tikwal akka netteɛraḍ ad nwali acu i xeddmen wiyaḍ, ama d imedyazen yettarun s tefransist neγ wid yettarun s taɛrabt.
Seg ayweqt i tebdiḍ tamedyazt ?
Asmi i lliγ qerraγ di tesnawit, imir-n sɛiγ seṭṭac n yiseggasen di leɛmer-iw. Asefru-w amezwaru uriγ-t γef tefsut n yimaziγen. Sseba d aselmad-nneγ n tmaziγt, netta yessuter-d seg-neγ ad negg anadi γef tedyanin yeḍran di 20 yebrir 1980, aḍris i d-uriγ nekk d asefu, iɛǧeb-asen akk i yimdukal-iw di tneγrit.
D acu-tt tmuγli-k γef tfaskiwin n tmedyazt i yettmagan di tmurt n Leqbayel ?
D asnerni i yidles d tutlayt, γas ma taswiɛin yettili deg-sent kra n lixsas, maca ḥulfaγ
Belli simal yettnernay umḍan n temliliyin simal ttwenniɛent.
Nebγa ad nekfu awal-yid-k s usefru.
Atan ihi wa ad t-hduγ i akk imeγriyen n Uγmis n Yimaziγen :
Tektal abrid s yisiḍ
Tesbur-d kra n tfawtin ;
Telsa-d tardast n uceṭṭiḍ
Teqqar : Ḥna metqedmin !
Lḥijab a gma teḥsiḍ
Yegla-d s lɛer γer tudrin ;
Tegra-d timmuzγa tettγiḍ
D tukksa n sser i d ddin.
Yesteqsa-t, Mokrane Chikhi