Tifeswin n tikelt-a xulfent tid iɛeddan. D tifeswin n tegrawliwin n medden meṛṛa. Di tmurt n leqbayel, si zik I d-nebda tikli… yal tikelt deg ara azzlen idammen, yal tikelt deg ara nṛuḥ d iseflan, neqqar res ay agellid ad rsen… iiiiiiiiiiiiiiiiiiiih! Res ay agellid ad rsent tzizwa n tefsut, ad ɛemrent teɣrasin n laṣel, teɣrasin n tugdut, teɣrasin n tlelli d yiseɣ. Tafsut d tafsut, tiɣrasin ssefruruxent, igelfan ttimɣuren, kul aglaf n tzizwa ad as-yezwir ugellid agaymru, yegra-d ad nheggi tiɣrasin, ad necɛel urɣu s ticcict n leɣbar aquran, tizizwa ur teqqsent ara, d tamment kan I d-ttakent…tiɣrasin n tfeswin n useggas-a, ad ačarent s tzizwa n tira n tmaziɣt, tira ad terr tili di Tubiret, ad neddu d yebrir, ad nelḥu tikli n : wesfel, tikli n Rachid At Musa, tikli n Faffa, n yiɣil d wefru, n tfeswin d tirga n Yidir di Barcelona, “ad as-nsemmi Yidir, ahat ad yidir”; At zik maci d awal kan, ad d-nemmekti asmi yella d askuti, Tuɣalin s MEZDAD, ass-nni, akken qqaren medden: tafunast n igujilen ur tettnuz ur trehhen! Ad nefk nnuba I tmusni, issin ansi d-tekkiḍ, ad teḥsuḍ anda tettedduḍ…xas d mmi-s n igellil, ad bedd di tizi n wass-a, ad k-id-iqabel umennuɣ… Aṭas ara s-yinin: “res ay agellid ad rsen», maɛna tarusi n tikelt-a am trusi n tzizwa yeṭṭafaren iferzizwi, ad ɛemrent taɣrast, ad semdent aglaf.. aglaf-nneɣ d tizi, tiwwura n tefsut d taɣuzi n yedles, ccqarrweɣ-ken, ur ttilit d awal kan, gert-as irebbi I tmusni, acḥal-aya wa yjebbed wa ykerref, tikelt-a, timlilit di Tizi, ad nreẓ leqyud i ɣ-yurzen: d at tseddawiyin, d agad yeṛzan asalu di tefsut n tmanyin, wid I wumi kksen accaren di Berwagiyya, yerna ur xdimen, wid yefkan ccan I MOHIA Abdellah, I Ahmed Azeggagh; wid d-yessuysen amur I tmaziɣt deg ijernanen n Lezzayer, d aɣmis n imaziɣen neɣ d iẓuran, tikli yiwet, xas abrid yemmxallaf! Yyaw ɣer tfeswin n wass-a, ad d-nini I ɣ-yerḥan ɣef tmaziɣt ass-a, ad nesmekti igujilen n yiles, tilufa iɛeddan maci am tid n wass-a… yyaw ɣer tizi n usayes, wa s wawal, wa s tira , wa s uwelleh n warrac yeqqaren tamaziɣt di llakul, wid-nni igan llsas I webrid ajdid I s ara s-tili tmaziɣt deg ul, d udem-is kan walit-tt! Ad nilit d wid-nni yettarun di facebook s teqbaylit, s tcawit neɣ s tmaziɣt n Lmaṛṛuk, wid-nni iḥerzen ccnawi n imaziɣen n tmurt n leqbayel, wid-nni d-yesrun Jean Lmouhoub AMROUCHE s teqbaylit, ad nessendu taxsayt, ad nemmekti tiyemmatin icewwqen acewwiq n leḥzen makken uran tilelli s idammen-nnsen… Yyaw ɣer Bgayet, ɣer Timimun I d-yettaken tazennatit seg ulac, d ahellil deg wexbu n tguni, lexwaṭer rsen, tidet tban am yiṭij…Rnut dagessar cwiṭ, steqsit ɣef at weɣlan, init-asen ma turam-tt, init-asen tiɣeṭṭen kif kif-itent, xas mxallafen yigran! Tifin-nnaɣ di tmenɣast, yal azamul d lmeɛna, serrḥet I yfassen-nnwen ad resmen ticraḍ melba idammen… timlilit deg yiɛezzugen, ad d-ilal yedles, ad as-nsemmi Mohia…di Lezzayer………….res ay agellid ad rsen.
Zira