Taggara n yimalas yezrin, ixeddamen n tɣiwanin n Tubiret myefken ttiɛad iwakken ad d-milen zdat uxxam n twilayt iwakken ad d-beggnen lɣiḍ nsen sdat n tsusmi n yimḍebbren ɣef yiɣeblan nsen.
Tasebḥit n wass n lexmis iɛeddan, azal n 100 n yixeddamen mlalen-d deg Tubiret, xedmen yiwen akken n ugraw iwakken ad mmeslayen ɣef ubrid ara aɣen ɣer zdat ahat ad ssiwḍen ɣer lebɣi nsen.
Imi imḍebbren n twilayt ur asen-ldin ara tiwwura i umeslay d ccwer, bedden dinna yixeddamen azal n snat n tsaɛtin. Ulamma ur rfin ara segmi d tikkelt tamezwarut, maca mwatan iwakken yal ass n lexmis ad d-mlilen ɣer zdat n uxxam n twilayt alamma rran-d yimḍebbren terza taluft ɣef usuter nsen.
Iwakken kan ad d-nesmekti d akken ixeddamen n tɣiwanin gren tiɣri acḥal aya i uɛawed n tmuɣli deg tjernaḍin nsen d waṭas n tneqqiḍin icudden ɣer tudert nsen deg lxedma. Ɣas akken ḥebsen ɣef lxedma tikkelt iɛeddan, maca acemma ur ibeddel deg liḥala nsen. D ayen i ten-yeǧǧan uɣalen ussan-a yezrin ɣer uneḥbus ɣef lxedma.
Sylia. M