Seg ass n 28 yebrir armi d ass amezwaru n mayyu, texdem tdukla n tmerrit d yidles Tiklat i iqeddcen di tγiwant n Leqser yiwet n ddurt tadelsant s wazal-is ideg mmugent waṭas n termad(activités). Leqdic-a i yemmugen deg uxxam n yilmeẓyen Mouloud Feraoun, yella-d ilmend n usfuggel n wagur aγelnaw n tgemmi. Yuγ lḥal d ayen iγef tqeddec tdukla Tiklat deg aṭas-aya ladγa deg ayen yeεnan anadi akked usekfel n umezruy n temdint taṛumanit Tiklat neγ Tubusuptu akked lqelεa n Temzizdegt i bnan di temnaḍt n Leqser yiserdasen n ddula nat Σebdlwadid deg useggas n 1327 akken ad ḥezqen tamdint n Bgayet yellan di tallit-nni seddaw n leḥkem n ddula Taḥefṣit. Deg ahil i texdem tdukla, llan-d yisaragen γef usentel n tgemmi akked tmerrit, taγuri n tmedyazt akked tceqqufin n umezgun i d-urarent trebbaε n yilmeẓyen i iqeddcen di ddayṛa n Leqser. Am akken daγen i d-ttwanecdent tdukliwin-nniḍen i iqeddcen di tgemmi am tdukla Anegraj n at Wertilen akked tdukla Oasis de Meggarine n Wareglen, tineggura-ya ttekkant s temzikniyin ideg d-feserent ttsaweṛ d tγawsiwin yesεan assaγ akked tgemmi. Deg ass aneggaru n ddurt-a tadelsant, tella-d temzizelt n uniwel(asewwi) n zik ideg ttekkant wazal n 30 n tlawin. Di temzizelt-a, tufrari-d massa Rabhi i yewwin araz amezwaru(15000DA), massa Hachemi Laâldja tewwi araz wis sin (12000DA), massa Boudraâ Nabila, tewwi araz wis tlata (8000DA).
M.C