Yenna umedyaz deg wawal-is :’’lukan d lεebd i t-yenγan, nekk yid-s ad nemseglu. Imi d lmut ayagi, ay yixef-iw rfed-as ad nru.’’ D tidet nru fell-ak a Chabane, aqcic argaz tameṭṭut, xas qqaren i yuγen irgazen ur ttrun ! Amek ur ttrun ara fell-ak medden ? Amek ara γelqen imawlan-ik tawwurt nutni yeẓran ur d-tekcimeḍ ur d-tkeccmeḍ i lebda ? Amek ara ttun kan akka yimeddukal-ik udem-ik,nutni yuγen tannumi ttawin abrid sbaḥ meddi yid-k ? Amek ara walin yiselmaden-ik s amekkan-ik, nutni yuγen tannumi s ucmumeḥ-ik ? Anwa ara yettun ass-nni amcun mi d-yewweḍ lexbar yečča-k wasif ? Amek ara ttun warrac-nni imecṭaḥ i iεerḍen ad ak-id-selken, ur ak-zmiren ? Amek ara ttun mi k-ttwalin tettezdareḍ ciṭ ciṭ di temda lqayen, ulac d acu iwumi zemren ? Ass-nni am wakken tezwar-d s ul-ik : sbeḥ, uqbel ad yeffeγ baba-k γer lxedma, tenniḍ-as ttḥadar iman-ik a baba ! I kečč, anwa iḥudren fell-ak ? Azal-nni, di&gamma,; uqbel ad tefγeḍ, tḥenceḍ yemma-k tenniḍ-as ḥemmleγ-kem a yemma ! Am wakken d slam n lebda i as-tbeqqaḍ ! Yiwen wass uqbel ass-nni amcum, mlaleγ-k-id deg ubrid tenniḍ-yi-d :’’teğğiḍ-aγ a Mass, nuγ yid-k tannumi’’. Ass-a d kečč i aγ-yeğğan a Chabane, ih d ṣṣaḥ tewεer tannumi. Anwa ara neṣṣeḍlem ? D wid yeγzan asif s tmacint ? Neγ d timetti d uγerbaz ur nexdim ttawil i warrac, ha-ten la ttmengaren ? Ne&gamma,; teččur-ak, d lmektub, yal wa ad yerğğu nnuba-s.
Aselmad-ik : H. MOULA