Ufiγ-d Duduc teqqummec
Tcemmer abruε-is ad t-becc
Di teẓgi seddaw ukerruc
Tugem-d si tala n at Mlikec
Afus-iw di teεrurt n weγyul d iyi-d-ibubben inebbec
Nettat tettṣeffir tettruc
Iṭij yekkat s aqerru
Ğelbeγ-d war akukru
Duduc tekker-d am tsekkurt
Ḥulfaγ la ceṭṭḥen isekla
Aγyul tewwet-it lmeγla
Duduc teṭṭef-itt tkekkuct
Zdat-neγ tajeğğigt tefsa
Aferteṭṭu sennig-s yettṣṣaḍṣa
Duduc tecmumeḥ seddaw tkerruct
Di tmesgida n at Mlikec la itedden
Ccix iserreḥ i wesreεreε a medden
Duduc daγen tessemγer taxenfuct
Akken ad kecmeγ s ul n tmeεmuct-iw
Wwiγ-tt γer tmeγra n dda Belqa
Walan-tt-id kan γef yidis-iw
Ssersen-as-d ikesman, seksu s yikkil d lmerqa
Tečča-yi ula d amur-iw
Rniγ-as aftat-nni ur d iyi-yecqa
Ugmeγ-d si tsebbalt aman
Ccah qdeγ-tt kkseγ jjif
Duduc daγen aṭas i teswa
Ssersen-aγ-d taqecwalt n tbexsisin
Meqqer-it annect n tbessasin
Duduc tewwet ayla-s daγen
Ssurgeγ-as-d latay s ucercer
Ifurran-is yettraḥ-d seg-sen zzeεter
Akken tettraḥ Duduc
D nnuba n lfires d ineγman
D acu kan yal tifirst tettfi d aman
Segmi wwant am Duduc
Yewwet-itt kan latay s aqerru
Tesbecbec-iyi-d s ameẓẓuγ « D acu tettrağuḍ kečč tura? »
Skerkreγ rrbeḥ s aεecciw dinna kan deg Yiγil n Weẓru
D aεecciw n taddart merra
Yezzi-yas-d ukermus, ad as-tiniḍ iga am usefru
Nufan tagrist usaγur
Teṛγa s weẓγal unaγur
Am Duduc d-teccef tidi
Walaγ aceqqiq nniγ-as i Duduc
« Ad t-nergel wa d aṭeṭṭuc! »
Am winna n Duduc
Di teγmert yers lmeṣbeḥ
Seg waḍu d-ikeččmen iceṭṭeḥ
Am tgecrar n Duduc
I tγimit yella dinna ula d abeḍṛun
Yiwen ur yeẓri imiren d acu ara yeḍrun
Am nekk, am Duduc
Nessa-d γef uhicur s weslen
Iburejjaq deg-i skikiḍen teqqsen
Am Duduc
Sγur Sεid At Mεemmer si Lalman
*Asmuḥyet n tezlit « Félicie, aussi » n Fernandel