D iseggasen yekreh rriḥa n tmeṭṭut, yennecham, mi tṛuḥ taɛzizt n wul-is. Ul yeqqlen d tanicca, rran-as tablaṭ lesnin, yekkukra aḥemmel, yugad tujjmiwin, yezzer di lbaḍna, ihuba iman-is. Tikwal iteffeɣ-as afus, d ayen akken deg-i tent-yuɣ I deg-s i yettaf iman-is.
Aru ay afus s uzelmaḍ, ad t-iɣer uyeffus! Allen msebɛadent, lxiḍ n ṛṛuḥ iẓeṭṭ gar-asen aɛdil s rrqem, s tmusni n wul, s tsusmi yettṛuzen uḍan , uḍan I s-iqedɛen abrid s axxam-is, “ ssiɣ lmeṣbaḥ wali-tt, di ṭṭlam aṭas I k-turja”. Iṣuḍ-d waḍu, yewwi-d ṣṣut-is d aḥnin aṭas I tt-yuṛja, am win yettṛajun Ṛebbi. Ttemwanasen s tsusmi, s unexẓur, s tuɣac n isekkilen yettazzalen deg wul am waman. . ufan abrid s tuffra. I yesla di tezlatin, yiwet deg-sent ur tt-id-tewwi: nek yid-m ur neslib ara, yya ma ad tedduḍ, Imaziɣen-agi ḥemmlen kan s tuffra . . Yettṛaju kan rriḥa n tinna akken iḥemmel. Aqerruy yeqqur, xas yebɣa-tt wul. Wissen ansi d-teḥlelli, ur yebni fell-as? As-tili deg wul, yis-s ara yidir … d tuqqda n usafu, akken t-smentagen I reqqen ttaẓen. Aḍu n leḥbab win yewwet, yettnusu di tawliwin . Tewweḍ-as s ajmam, ur yezmir I usenɣel. Ul-is iɛewwel ad ifelleq, ma yeǧǧa-tt yeḥreq, ma yeqqim yugad lemri. Yal iḍ la s-tt-id-yessutur am ddwa ḥellu, din din, amer yufi, am usefru ad tt-id-yesnulfu. Tibratin fesrent am lqecc imi ara yirid. Deg-sent tura temlilit, yiwen wass deg ussan, deg wegni n At Ḥend, leḥmurga n tmeddit, times tendeh deg ugemmaḍ, lḥamu ur telli, xas akken uɣud yesserɣay. .
Zira