Tettuneḥsab tarbaɛt n yilmeẓyen n Leqbayel (JSK) di yal ikuden (temps) d tarbaɛt igerrzen deg umaḍal n ddabex uḍar n tefriqt, imi i d-tufrar ger tiyaḍ mbeɛd imi i d-tezga d tis tesɛa ɣer yidis n ɛecṛa n trebbaɛ tiyaḍ i d-yufraren di lberr n tefriqt. Annect-a iban-d deg yiwen umegrad i d-tessufeɣ tkunfidiṛalit tafriqit n ddabex uḍar (CAF) di dduṛt-nni yezrin. Ad nesmekti dakken terbaɛt n Al Ahly n Maṣer tezga-d d tamenzut s 68 n tneqqiḍin, tis snat d tarbaɛt n yitri (Etoile) n Sahel n Tunes s 48 n tneqqiḍin, tis tlata n Maṣer daɣen, tagi d tarbaɛt n Zamalek s 47 n tneqqiḍin, ma d JSK tḥella-d 32 n tneqqiḍin dɣa temsawa akked terbaɛt n Hearts of Oak n tmurt n Ɣana. I umezruy, Iknaṛiyen neɣ Izmawen n Ǧerǧeṛ akken i nḥemmel ad sen-nsemmi, d tarbaɛt tawḥidt n Lezzayer i d-yufan iman-is ger ɛecṛa i d-yufraren di tefriqt, acku igemmaḍ n JSK deg uraren n tefriqt garrzen yal tikelt, ad nesmekti dakken deg umecwaṛ-is afriqi tḥella-d snat n teqbucin n trebbaɛ tilɣuɣin deg yiseggasen n 1981 d 1990, taqbuct n trebbaɛ i irebḥen tiqbucin aseggas n 1995 akked tlata tiyaḍ n tkunfidiṛalit iseggasen n 2000, 2001 d 2002….mazal lxiṛ ɣer zdat.
Farid Lahouari