Deg yinaw i d-yefka i ugdud deg ass n lǧemεa iεeddan, agellid n Lmeṛṛuk Muḥemmed wis seddis (Mohammed VI), yeγra-d srid ixfawen yemxalafen n usenfar n useggam n tmendawt iγef ara d-yili rrifirundum ass n umenzu n yunyu i d-iteddun. Deg inaw-is, Mohammed VI iwehha-d γer usteεṛef di tmendawt tamaynut n tgelda s yakk izerfan idelsanen d tutlayin tinamurin(tiγelnawin) n ugdud ameṛṛuki, deg ixef wis sin yenna : « Asmendew (constitutionnalisation) n tmaziγt d tutlayt tunṣibt n tgelda γer yidis n tutlayt taεrabt…Wa d asurif ameqran nga-t ilmend n usekfel n tmaziγt yellan d tigemmi ideg ttayalen akk yimeṛṛukiyen, asenṣeb-is n tidet ad d-yili kra kra, s usufeγ n leqwanen ara iwelhen asekcem-is deg uselmed d yiḥricen izuyaz-nniḍen ». Yuγ lḥal, agellid Mohammed VI iwehha-d weqbel γer usmendew n tmaziγt deg yinaw i d-yefka ass n 09 meγres yezrin mbeεd timesbaniyin yekkren deg aṭas n tamiwin n tgelda ass n 20 fuṛaṛ, neγ ayen umi ssawalen : « Amussu n 20 fuṛaṛ ». Asteεṛef s tmaziγt di tmendawt tamaynut n Lmeṛṛuk aṭas i yestṛeḥben yes-s imi yettusemma d asurif ameqran deg umezruy n umennuγ γef tmaziγt, acu kan aṭas daγen n wid i yesneqden asenfar-a n tmendawt imi ur d-yefki ara tifrat ilaqen ladγa i yiγeblan n tmetti d tdamsa i yellan ger ssebat iγef d-kkrent tmesbaniyin.
Mokrane Chikhi