Wwḍen 13 n yiseggasen segmi yettwanɣa Lwennas. Tala Bounane tezmer ass-a ad d-tefek chada ɣef twaɣit iwumi teḥḍer ass n 25 di yunyu 1998. Terɛed, tebreq, yemmar-d rrṣas am ubruri ɣef yiwen akken ur nukir, ur nenɣi, yenna-d kan ayen i yettwali. Ɣas ulamma zrin yiseggasen ɣef tmettant-is, maca, s ya ɣer da, ad ak-yini yiwen : yenna-d Lwennas, yexdem Lwennas…Ur yezmir yiwen ad t-yettu, nettmektay-d yal ass imeslayen-is, ahat tikwal nettxayal-d ula d tafekka-is. Ihi, acimi i negguma ad t-nettu ?
Yenna Lounis At Manguellat deg wawal-is :
Ameslay ḥed ur t-ineq
Wanag lɛebd yettmettat
Ameslay mi ara d-yeṭṭerḍeq
Lǧil i t-yebɣan yufa-t
Waqila xir lmenṭeq
Ini-t-id qbel ur k-ifat.
Deg yal tallit, yettili-d akka yiwen n umedyaz, neɣ ahat akken i s-qqaren « amɣar azemni », ara yilin di lmendad i yimdanen, ad yessefruy, ad yettmeddiḥ, iwakken ad yessaki wid yeṭṭsen, neɣ ad iwelleh wid yekkren. Si Muḥend, Yusef U Qasi d Lbacir Amellaḥ, yal yiwen acu yexdem deg tudert-is anda sfaydan yimdanen seg tmusni-s. Matoub, ɣas ulamma iḍelli kan i d-ilul, yedder ḥala 42 n yiseggasen, maca ad d-tiniḍ nnig n lqern i yedder, ma nmuqel acḥal yecna d wayen yenna. Lukan kan ad neɛreḍ ad nesqerdec kra seg tezlatin-is, ad d-naf d akken yeḥsa ula amek d wanda ara yemmet. Aya, ad t-naf deg :
Ass-agi lliɣ
Azekka wissen
Nniɣ-d ayen i ẓriɣ
D wayen i ttwaliɣ
Cfut di terga ma ɣliɣ
D anzaw ara wen-d-yessiwlen
Mačči dɣa di terga i teẓlen widen akken i d-iqesden ɣer lmut-is ?
Seg tama nniḍen, di lḥers n tefsut n 80, yecna yakan « yeḥzen lwed Ɛisi », tizlit dɣa i d-yernan tabɣest i yineɣmasen, imi am wakken yettwassen, yenna-d ayen i iwala d wayen i yettidir. Yal ass deg unnar, imenɣi-s yezga s uzday n lqedd, aya zemren ad d-cehden fell-as isdawiyen n tallit-nni, imi yezga ɣer tama nsen. Nezmer kan ad d-nebder ass-nni mi iruḥ ɣer Micli netta s sin yisdawiyen iwakken ad gren tiɣri i yimdanen ɣer lehna mi terɛed akken deg tmaneɣt. Din i yuɣ tiyita qessiḥen, imi 5 n terṣaṣin i ifetken tafekka-s s-ɣur yiǧadarmiyen.
Ɣas akken deg wusu, maca yenna : « mazal ṣṣut-iw ad yebbeɛzeq ». Yebbeɛzeq s tidet, imi yezzi-d lḥers n rrebrab, ur yerwil, ur yebri i ṭṭbel deg waman. Yak yenna deg yiwet seg tiliẓriyin n fransa mi s-nnan, ilaq ad tesdergeḍ aqerruy-ik, ma ulac rrebrab ad k-yemḥeq, yerra-d akka : « Ah non Madame, je dois y retourner, j’ai un combat à mener là-ba »
Yerfed leslaḥ, iɛus deg yiḍ am netta am yimezdaɣ n taddart-is. Am wakken daɣ yecna ɣef at yičumar d wayen i ixeddmen, ɣas akken yekka-d si gar yifassen nsen, mi yettwaṭṭef azal n 17 n wussan.
Lḥasun, isers-d gar wallen-is lɣerḍ, yettḥeṣṣin amek ara t-iḥaz : adabu d yimeṭṭurfa inselmen.
Kra akk i ttmeslayen yimdanen deg tufra, netta yeqqar-it-id ɛinani. Aṭas dɣa i d-yennan d akken Lwennas d isem-is i d lfeɛl-is : yettwanas !
Deg tezlatin-is tineggura, yesmar-d ayen i ttrajun seg yiqbayliyen. Tamezwarut, d tagmat ! Yebɣa ad yesdukkel Lhacimi (ad t-yerḥem Rebbi), Sadi d Dda Lhusin. Dɣa ɣef waya i d-yenna :
Ma nnan-ak d acu i d tafat
Ini-asen d iɣallen yeddukklen
Yecna-d Aɣurru ! igerrez-it-id akken ilaq. Yurar s yimeslayen am walqafen ! S tidet, icrew-d si zman aqdim. Yerra-d ṛṛuḥ n teqbaylit, yewzen imeslayen ad tɣileḍ d amɣar-nni n wahuya.
Yecna ɣef maḥyaf, yebded ɣer tidet, yezga deg unnar, yekkes ẓẓerb i tugdi : degmi i k-nḥemmel a Lwennas !
Sylia. M