Mačči kan teṭṭef Tizi Wezzu taqacuct n wid irebḥen BEM aseggas-a, meεna leεmer yewweḍ, di tmurt n Lezzayer, ugmuḍ yecban wa : 87,47 % i t-id-yewwin, gar 14 669 yinelmaden i yesεeddan, rebḥen 12 784 di Tizi Wezzu. Neεreḍ ad nefhem sser n waya : amek ‘’tiḥerci-a’’ tekka-d γer yiselmaden neγ γer yinelmaden ? Neγ d kra n ttawilat i tekseb lwilaya n Tizi Wezzu ur tesεint ara lwilayat-nniḍen ? Imi ula d BAC, d Tizi Wezzu i d-yettazgen deg umḍiq amezwaru di 3 yiseggasen-agi iεeddan. Ihi nesteqsa kra n yimdanen. Tamezwarut d taselmadt n taεrabt deg uγerbaz amenzu, tenna-d :“nekni di tmurt n Leqbayel, ttεassan yimawlan aṭas dderya-nnsen γef laqraya. Ad d-ksen idrimen seg uksum-nnsen i wakken ad sseγren arraw-nnsen, ad asen-xelṣen timsirin n zzyada. Mačči am temnaḍin-nniḍen n tmurt n Lezzayer anda tiyemmatin ttceyyiεent arraw-nnsent ad snuzun dexxan d kawkaw u mi asent-id-wwin idrimen-nni ad ruḥent ad d-zeynent iman-nnsent s les mèches γer tekwafirin.’’
Ma d Remḍan, d aselmad n tmaziγt, iwala belli d tinqiḍin-nni n tmaziγt i yessawḍen γer wanect-a. “Inelmaden akken ma llan sεan tinqiḍin igerrzen di tmaziγt ladγa anda sselmaden s la pédagogie de projet . Nekk sεid wid i d-yewwin 19,5. Wali tura acḥal ara tεiwen tmaziγt di BEM, yerna tamaziγt tesεa cœfficient 2.’’
Ḥasan d ababat n unelmad : “tanemmirt tameqqrant i yiselmaden, icebba-yi Rebbi di tmurt n Leqbayel xeddmen seg ulawen-nnsen. Yerna amur ameqqran sεan dderya yeqqaren, llan wid yesεan, εad, arraw-nnsen d inelmaden.”
Ḥmed d anelmad i d-yewwin BEM : “akka yerna qqaren d les voyous yilmeẓyen n Tizi Wezzu ; ttawin-d les examens s copiage. I tura acu ara d-inin, yaxi ceyyεen-d aglaf n les observateurs n lwilayat-nniḍen i aγ-iεussen, mkul la classe s yiwen. Win iḥercen, yeḥrec, hahahha.’’
Rabaḥ yiwen gar yimḍebbren n sindika : “azrem d Mḥend i t-yenγan, cciεa-s d Abusliman. Deg yisem d lecyax i iεetben, cciεa yewwi-tt unemhal n ttrebga n lwilaya n Tizi Wezzu. D netta iwumi ssmeγren ccan.’’
Ma d Belqasem, d aselmad di tesdawit, yenna-d s teḍsa : “imi lakul yezleg, ihi d Tizi Wezzu i tt-yewwin di tizzelgi ; d netta i yesεan aṭas n yizligen, εlaḥsab n waya…’’ Amek ara neḥseb Tindouf d taneggarut, imi arrac ines ahat qqaren yiwen wass i smana ? Ulac ttawilat…’’
Akken yebγu yemxalaf rray n yimdanen-agi, acukan tamsalt n wuswir n leqraya tesdukkel-iten akk : ‘’ixuṣ aṭas lakul azzayri, yugar ucerrig tafawet.’’
Hocine. M