S tidet, d ayen i irennun di ccan n uɣmis n Yimaziɣen mi ara d-ilint tezrawin yecban tigi di tesdawiyin ladɣa di turagt. Ulamma timawin i d-wwint tnelmadin-a d tid ara yesnernin deg uswir n tutlayt, maca ilaq kan ad ẓrent d akken aɣmis ur yeɛni ara kan isdawiyen d wid yeqqaren tamaziɣt.
Deg tazwara, iswi n uɣmis d asiweḍ n yisallen mačči d aɣerbaz ad yesselmad tutlayt i yimdanen, aya yerza akk iɣmisen akken i tebɣu tutlayt i s-iqeddec.
Tis-snat, imeɣriyen yemgarad uswir nsen akken i mgaradent tantaliyin. Ur nezmir ad d-nini awal-a n taɛrabt, ahat llant temnaḍin anda i yella d anaṣli. Ur yeshil ara usɣerbel, yerna ma nuɣ abrid n usiffi n tutlayt ad naweḍ ɣer tmaziɣt n « laboratoire », imir akken i qqaren : anda i tufeg i ters !