S yigemmaḍ n temzizzelt n yisefra akked tikci n warrazen i yimedyazen i d-yufraren deg wussan n Tmedzayt « Yusef U qasi d Si Muḥend U Mḥend » i tuli tedwilt tis- tẓa ( 9) i d- yeḍran am yal tikkelt di Timizar n At Jennad.
Deg wakka, arraz amezwaru di temzzizelt n tmedyazt yuɣal i Massa Chili Lila i d-yemmuger wiyen cqar anect-ilat, imi yakk wid yettikkin deg tafska ddan d ufran n tesqamut n uktazal ɣef tin yella d aselway Mass Ḥasen Ḥalwen.
Arraz wis -sin yettunefk i yiwen n umedyaz i d- yewwin yid-s asirem meqqren i yimal n tsekla taqbaylit, d Mass Selmi Musa, ma d arraz wis-krad( 3) yuɣal i Luni Husin yettwasnen yakan acḥal aya.
Si tama nniḍen, asqamu n uktazal igzem-itt di ṛṛay iwakken ad yefk arrazen nniḍen am arraz n « Ait Menguellet » i Mass Yunsi Mulud, arraz n « Racid Ɛellic » i tmedyazt Metahri Hakima i d-yesnin aɣanib amaynut i tira n teqbaylit , arraz « Ɛmer Mezdad » yuɣal i Mass Benkhelifa Salim. Tamedyazt tacawit Jeridi Fatiḥa ula d nettat tewwi arraz, s wazal-is.
Ɣer tama n temzizelt n yisefra tella diɣ « temzizelt n tsuqilt » ( adaptation / traduction) anda i d- yufrar Mass Ibri Ḥamid, am wakken diɣ i d-tella yiwet n « temzizelt n tmezgunt s yisefra » (montage poétique) anda yuɣal warraz n usebɣes i Mass Xaṭabi Aḥmed.
Ɣef wakken I d aɣ- d- yenna uselway n tfaska Mass Hamid : « iswir n taggara n temzizelt d win yulin aṭas, ad nesnemmer tasqamut n uktazal imi tella-d di lmendad i waya, u tfern-d imedyazen I d -yewwin amaynut , imsefruyen iɛerḍen ad sseftin awal n teqbaylit akken tasekla nneɣ ad tili am nettat am tin n leǧnas imeṛṛa. »
Teɣzi n xemsa n wussan, taɣiwant n Ssuq Lḥed tedder yiwwet n tmesbanit anda I d- mlalen akk wudmawen n tẓuri, tamedyazt, ccna, amezgun d tceqqufin i warrac imecṭaḥ . Mebla ccekk, ayen wuɣur tezzi lwelha s waṭas d tajmilit I d as- yuɣalen i Lunis Ait Menguellet deg wass n tulya tunṣibt i « wussan n tmedyazt Yusef Uqasi akked di Muḥend Muḥend » s uneḥḍur n wacḥal d anaẓur akked yimeyyaten n yimdanen, am wakken I d aɣ-t-id- yenna Mass Nurdin, s timmad-is d imneddeh ( porte parole) n tfaska : « ass-a, d at wawal ara s yerren tajmilt i bab n wawal. Tirza n Lunis tekcem deg umezruy n At Jennad, yelha ticki d wid yettseggimen iḥulfan d awal ara d- yinin awal ɣef win yessexdamen awal “.
Imezdaɣ n Timizar s demma n tfaska tettunefk-asen ad sɛeddin diɣen kra n lewqat urǧin yettwattun akked ucenay Ɛli Amran yesfeṛḥen wid I t-iḥemlen I d- yusan ad t-walin ass n lexmis yezrin. S wakka ihi tafaska tewweḍ iswi-ines D ayen ara yerren si tura imezdaɣ n Timizar ad rǧun tadwilt tis- mraw( 10) imi akken qqaren deg wawal : win iɛerḍen tacriḥt n tsekkurt ur iqenneɛ ara.
Ait Slimane Hamid