Lakul n Lezzayer d tneslemt
Ur ilaq ara ad yili wahil n llakul n Lezzayer yeddukel, kif kif-it. D mmi-k ara yuɣalen s uzekka d arebrab. Win yebɣan ad ifek mmi-s ar llakul ad iɣer leqran, ad t-iɛin Ṛebbi di ccɣel-is, win yebɣan mmi-s ad iɣer anda nniḍen, d leḥq-is daɣen. Acuɣer ara nesbuccaɛ Ɛuqba Bnu Nafeɛ, neǧǧa Kusayla? Ass-a llan acḥal n leǧwameɛ s yisem n Ɛuqba, tamdint isem-is Ɛuqba…mmi-k tzemreḍ ad as-tsemmiḍ Ɛuqba, ula d mmi zemraɣ ad as-semmiɣ Kusayla ula d nekkini. Azekka ad ten-yessemlal umezruy, deg yiwet n ṭṭabla n llakul, ad ɣren amezruy yebnan ɣef ṣṣaḥ, d acu ara yeḍrun imiren? Ayɣer nhuba amezruy? Ayɣer t-ffren ɣef yezzayriyen? Azzayri maci d aɛrab akken t-ḥsiɣ! Ma yella d tinneslemt, yal wa d ṛṛay-is, xas ur lliɣ ara d inneslem, d azzayri I lliɣ, ḥemmlaɣ tamurt-iw, fell-as ad sebblaɣ idammen-iw…
Amussu adelsan amaziɣ(MCB)
Amennuɣ ɣef iẓuran, ɣef timmuzɣa yebda-d si zik n zik, uqbel amussu azzayri. Amussu adelsan amaziɣ iban-d seg wasmi tefra Lezzayer, ttnaɣen ɣef izerfan, ɣef leḥq-nnsen, d amussu n talwit, d amennuɣ ɣef tnaṣlit, ɣef timmuzɣa yeɛfes udabu s iḍarren-is. Yebɣa tamaziɣt ad tuɣal d tutlayt tunṣibt taɣennawt, ad tt-ɣren warrac, ad tili di tmendawt.
Asmi t-ukren irebraben…
D ayen ur iqebbel leɛqel, yal as igellu-d s tmettant, ttrajuɣ lmut-iw si lweqt ar wayeḍ. Ccwi kan sɛiɣ wid i y-iḥemmlen, ttewtaɣ s rrṣaṣ yakan di 1988, 5 n terṣaṣin i yeččan ṣṣura-w, tlata iseggasen d wamek d-uɣaleɣ am nek am medden. Sakin, tusa-d twaɣit n irebraben. Ass-a, jerḥaɣ ur ḥliɣ ara, ad kemmlaɣ amennuɣ-inu, mgal adabu-yagi ugin izzayriyen, mgal rrebrab i d-yennulfan tineggura-yagi. Rran-iyi-d gar wallen-nnsen imi ɣer-sen ccna d leḥram, wwin-iyi imi ɣer-sen d nek i yessufɣen izzayriyen I ubrid ama s ccna-w ama s wawal-iw I medden , I tɣamsa. Ugadeɣ… ttṛajuɣ ad mmezlaɣ neɣ ad iyi-yečč rrṣaṣ-nnsen.
Tamurt
Di tmurt-iw kan I ttafeɣ iman-iw, terra-yi tmara ad iliɣ anda nniḍen, tegguni-yi tmettant, ma kecmaɣ Lezzayer, sin wussan neɣ tlata kan ad iyi-nnɣen. D wid-iw I y-id-iselken si tmattant acḥal d tikelt, nnig n umelyun d nnefṣ n lɣaci I yellan eṛṛa asmi I yi-yukren irebraben, ur d-tettas ara kan akka, d azeɣbub-nni n usirem I zerɛaɣ deg wulawen-nnsen yellzen I ten-id-yewwin…
Idurar n Ǧaṛǧaṛ:
Ttemyafeɣ d wid I yḥemmlen ccna-inu di leqhawi, deg imukan nniḍen. Ulac wi izemmren ad yeṭṭef amkan n idurar n Ǧerǧaṛ, ḥemmlaɣ-ten idurar-agi, d lɛemr-iw.
Ineɣmasen
Ass-a nhedder ɣef lmut, ɣef ineɣmasen, di tallit-nni deg-I nfan KATEB Yacine di tmurt-is, yella wi d-ihedren fell-as deg yineɣmasen, yella wi d-ihedren ɣef timmuzɣa, ɣef tnaṣlit. Ass-a aṭas I wumi truḥ tgella d lmelḥ, wwin-d ttesriḥ anda nniḍen, am zik-nni. Taɣamsa n Lezzayer maci n wassatt, ur d-tlul ara di 1988, tella si zik. Tidet tban am yiṭij, nek ttqadareɣ tudert, bɣiɣ tudert, bɣiɣ tugdut, meɛna ur bɣiɣ ara ad uɣaleɣ ar ukabar n FLN, ar at uzaglu d ddel.
Tugdut
Tugdut ad tili ticki ara namen yis-s. Maci d leḥyuḍ, maci d ixxamen. Agad-nni yettarran iman-nnsen d imusnawen, anda llan asmi yettɛeggib udabu, agad-nni yeṛza, ur ttiliɣ ara s idis n wid yexlan tamurt-iw.
Idles amaziɣ:
Idles amaziɣ d idles n izzayriyen akken ma llan. Ur heddreɣ ara taɛrabt, bɣiɣ taɛrabt n Lezzayer, ssneɣ-tt cwiṭ.
*Ttawakksen-d si tdiwenniyin yexdem Lwennas MAƐTUB d ineɣmasen n tilibizyuwat n tmurt n Fṛansa.
Terra-ten-id ɣer teqbaylit Zira