Ul sennin, rnu-yas zzeṛb n uɣanim, yeḥka-tt cceṭ i tɣalaṭ ! Aṭas i yenwan yessuli llsas s lewqam, aṭas i yenwan ul-is am weẓru n tnicca yessen kan ad iḥemmel di lbaḍna. Aṭas i yellzen seg wakken yettwaqqed wul-nnsen tuqqda n usafu, deg unebdu n leḥrur. Yiwen wass, i tziri d yetran, imi ara temlil lqaɛa d igenni s wezmumeg n wussan, ad tbeddel fell-aɣ: kullec ad yettirriq akken ara ttirriqent wallen imi ara d-myafent di tizi n tisselbi.. Tisselbi! D acu-tt? D ayen akken i d-yettarran ul d aleqqaq? D ayen akken i d-yettarran ṛṛuḥ ticki akken nuyes, ticki i nenwa newweḍ ɣer talast taneggarut n tudert d win neɣ d tin nḥemmel? D ayen akken i ɣ-yettwellihen ɣer tikli am waman zeddigen gar-aɣ d yiman-nneɣ? Tezdeg, tidet, aman, aḥemmel, tudert, tilin, zzeṛb n uɣanim.. kra din ur d-yettili ma ur yemlal” yiwen d nek wayeḍ am nek”. Amacahu ɣef wasmi ara d-mlilen. Ara yṛuḥen d iseflan, di tmurt n tisselbi : zzman, amkan, tawenza, axxam, llsas, ulawen… kullec ad yefsu, lebɣi ad yazzel am tala di tregwa n wul. Ad llint tewwura, ad banent tsura. Ziɣ mazal ul d aleqqaq, mazal cwiṭ n lemḥibba ara d-yerren ṛṛuḥ kra n wanda iṛuḥ…
Zira