“Axxam-a xuṣṣen-t yifassen d yiḍarren ara yesbedden lqedd n umezgun’’ akka i aγ-d-yenna unemhal ajdid Smail Amiar mi nerza γur-s. I usmekti, axxam n umezgun ‘’Kateb Yacine’’ iεawed yeldi tiwwura-s deg useggas 2009 mbeεd mi d-yella useqεed-is akken ilaq (ṣerfen fell-as azal n 38 n yimelyaren). Seg wassen ar ass-a, εeddan tlata n yinemhalen : Fouzia Ait El Hadj, Ahmed Khoudil aneggaru d Smail Amiar i t-yeṭṭfen si leεḍil. Mass Amiar yebda axeddim-is smana-agi iεeddan, nerza γur-s, nesteqsa-t γef wayen i t-yerğan, yenna-aγ-d :
Aγmis n yimaziγen : i wacuγer abeddel n unemhal i yal tikelt ?
Smail Amiar : lukan axir ad testeqsiḍ inemhalen iruḥen. Nekk ass-a usiγ-d ad sdukleγ timuγliwin i wakken ad naẓ γer sdat. Axxam-a xussen-t yifassen d yiḍarren ara yesbedden lqedd umezgun.
Amek i tenwam ad tqablem anect-a ?
Leqdic nneγ ad d-yili akked medden akk, mebla taneḥyaft. Nebda yakan akked tiddukliwin yellan di tuddar. I lmend n waya, dγa, ara d-greγ tiγri i wid akk yesεan acu ara d-fken i umezgun, ad d-qerben γur-neγ. Tiwwura n uxxam n umezgun ha-tent llint. Ansuf si yal yiwen ara d-yernun afud i umezgun.
I wahil-nwen ?
Yella wayen i d-nhegga i waggur-agi n remḍan ladγa timezgunin deg yiḍ, yella wahil-nniḍen s teγzi n useggas. Ahil-a yeεna aselmed d usegmi n yilmeẓyen d yiεeggalen n tiddukliwin di yal aḥric i t-tetteḥwiği tceqquft umezgun. Am wakken llant, di&gamma,; 7 n tzeγwin n uselmed d usewjed n wayen akk icudden γer umezgun.
I tmaziγt deg wanect-a ? Aṭas i d-yeqqaren ur as-fkin ara amekkan ilaqen wid-nni iεeddan.
Ilmend n waya, ihi, nhegga-d sin yisenfaren. Wigi d ticeqqufin umezgun. Tamezwarut, am win yettrağun Rebbi. Tis snat, akal d yidammen. Mebla ma nettu ahil i d-nessewjad i warrac imecṭaḥ imi nenwa ad nissiweḍ amezgun γer yal taddart. Nhegga-d ttawilat-agi iwulmen i wanect-a.
Awal-ik aneggaru.
Ssarameγ remḍan igerrzen i yal azzayri. Afus deg ufus i wakken ad nesnerni idles d tγarma-nneγ. Tanemmirt-nwen ula d kunwi.
Yesteqsa-t: Hocine. M