Mazal kkawen yidammen yuragen di Tizi Wezzu s ssebba n yiwet n lbumba yeṭreḍqen dinna zdat n uxxam n yimessulta i d-yesseglan s 33 n yimejraḥ akked lexsara di cci, zzin-d yiɛdawen n tudert ɣer temdint n Tubiret iwakken ad ssekren deg-s abaxix. Ihi, deg yiḍ n letnayen ɣer ttlata yezrin, iɣallen n laman ssawḍen ad smenɛen imezdaɣ n Tubiret seg yiwet n twaɣit tameqrant. Am yal iḍ, tamdint tleɣɣu d imdanen, ad d-tiniḍ akken d ass. Ulac akka kra n yiwen ara icukken ad d-yeḍru wayen n diri, imi iɣallen n laman ɛussen yal taxliǧt. D acu kan, win i as-yennan tiẓgi texla, d netta kan i yexlan ! Imi, snat n lbumbat i yettwaheggan deg sin n yimukan iɛemren mačči d kra. Uqbel ad d-yeḍru uxessar, wigi yettɛassan ɣef lehna n yimdanen ssawḍen ad ten-id-kksen. Dɣa, din i yekker wahruḥu, imi yal tamnaḍt teččetki si tugdi. A tt-a da yiwet, a tt-an din tayeḍ, lḥasun, imdanen yeffeɣ-iten leɛqel. Srabes n laman ldin akka yiwen n ukaram n unadi iwakken ad d-beggnen aniwi i yebɣan ad ssizlen idammen n yimdanen deg waggur-a n remḍan.
Si tama nsen, imezdaɣ n Tubiret irkeb-iten lḥir, nutni yumnen akka belli ters-d lehna di tmurt, ulamma s ya ɣer da sellen s wacu i d-iḍerrun di kra n yimukan ibeɛden, meɛna gguman ad d-afen ixf i tedyanyecban ta, tin akken yellan kan deg yiseggasen n 90. Nezmer ad d-nesmekti, belli deg useggas n 2008, teṭṭerḍeq akka yiwet n lbumba di Tubiret anda irebraben qesden yiwen n lkar yeṣṣawaḍen ixeddamen Ikanadiyen. Meɛna, abaxix iwumi i d-sɣamen tikkelt-a isers-d rrehba.
S.M