Ala 15 n yiseggasen i tesεa di lεemṛ-is, Mira Duga mebla ccek ad d-tezg d nettat akk i d taselmadt n tmaziγt meẓẓiyen di leεmeṛ. Di lweqt anida tamurt n Libya tuγal d tirgit s sseba n ṭṭṛad i iḥettem fell-as Lqeddafi i yugin ad yettixeṛ seg leḥkem, tama n Udrar n Neffusa ideg akk imezdaγ-is d imazγawalen(amazighophones) ; tuγal d annar ideg qesḥen yimenγan gar yigrewliwen d yiserdasen n Lqeddafi, yuγ lḥal seg zik imezdaγ n tama-ya sεan taεdawit yid-s, imi netta yugi ad yesteεṛef s tutlayt d yidles amaziγ ayen akk εzizen fell-asen. Mira, taqcict-a tameẓyant n temnaḍt n Ǧadu i d-yezgan deg Udrar n Neffusa, γas akken di tegnit n ṭṭṛad, nettat telha-d d uselmed n tmaziγt i yigerdan n taddart ideg tezdeγ. Tesselmad-asen isekkilen n tmaziγt, tettak-asen-d kra n temsirin n tjeṛṛumt d umawal, ayen yellan megdul ad t-yexdem yiwen asmi llant temnaḍin-a tigrawliwin ddaw n uzaglu n leḥkem n Mεemmeṛ Lqeddafi. Aselmed n tmaziγt i warrac n temnaḍt n Ǧadu d yiwen n urmud(activité) agejdan i txeddem tiddukla « Izerfan n Tmeṭṭut Talibit » i d-ilulen di kra kan n wussan mbeεd tagrawla n 17 fuṛar i yuγen akk tama n Udrar n Neffusa. Tiddukla-ya ideg tettekki tmeγnast tameẓyant Mira Duga, iswi-ines d asekfel n tutlayt d yidles amaziγ d umennuγ γef yizerfan n tmeṭṭut.
Γef wakken i d-tenna Mira Duga i tesnurayt n yisallen (agence de presse) Reuters, aγbalu ideg d-newwi isali-ya, « Tamaziγt di Libya aṭas i tḍa&epsilon,; yerna Lqeddafi yugi-aγ ad nemmeslay yes-s deg yimukan izuyaz, nettmeslay yes-s ala di tudrin-nneγ d yixxamen-nneγ. Nekni, akka tura, nεeṛṛeḍ ad d-nessemneε awalen i as-iṛuḥen i tmaziγt s sseba n war asemres-nsen, nεeṛṛeḍ daγen ad sen-tt-nesselmed i warrac akken ad ṭṭfen di laṣel nsen ; acku tamaziγt d taγerma nne&gamma,; d idles nne&gamma,; d tutlayt nne&gamma,; daγen d laṣel nneγ ».
Yal ass, seg lxemsa d uzgen alamma d ssebεa d uzgen n tmeddit, i teγzi n snat n tsaεtin, Mira Duga tettak-d i warrac deg uxxam n tiddukla timsirin n tmaziγt, timsirin i telmed nettat s tuffra deg wussan n uqbel tagrawla γer yimeγnasen n tmaziγt i yellan s waṭas di temnaḍt n Ǧadu. Mebla ccek, azekka n tmaziγt yessefṛaḥ di Libya, segmi yakan i tebda tegrawla, aṭas n yiγmisen i d-ilulen ttarun deg-sen s tfina&gamma,; uran-tt γef tewwura n tḥuna d leḥyuḍ di yakk timnaḍin n Udrar n Neffusa, ula d ṛṛadyu n tama-a n umalu n Libya, tuγal tessawal s tmaziγt, mebla ma nettu tiliẓri « Libya al-Huṛṛa » i d-yesεeddayen yal ass iγmisen s tmaziγt. Di teswiεt-a, tamsalt tamezwarut i iceγben imezdaγ di Libya d laman d talwit imi mazal εad ur terkid ara tegnit segmi i teγli Tṛablus deg yifassen n yigrawliwen, mbeεd tifrat, mebla ccekk ad d-yuγal wawal γef tmaziγt akken ad tekcem γer uγeṛbaz d tsudwin n udabu n Libya tatrart.
Mokrane Chikhi