Iɛeqqayen n ubelluḍ d iqehwiyen, ẓidit am ṣṣker. Kkseɣ-ten-id yiwen yiwen s lemḥadra, si tbelluṭ-nni nneɣ yettarwen aseggas tesgunfuy wayeḍ. Acḥal bninit ! Fiḥel ma nniɣ-awen. Lbenna n Ṛebbi, rnan tin n ufus i ten-id-yecleqqfen d acelqef akken ad idiren yid-neɣ tirga n waman, tirga n tlisa i d-yekkan gar-aneɣ almi neṭṭef ula deg ubelluḍ ! Tawwaṭ taqehwit ters ɣef umeṭraḥ, deg-s am acemma rriḥa n tezweɣ, terna taḥacyat i tt-id-icebbḥen akken ad teddu d tislit i wanẓar. Nneẓrent tewwura n wulwen, ur tufiḍ tageṭṭumt ara yafen iman-is gar-asen. I d-yeqqimen ala rriḥa n tmurt yesmentagen isufa s ifeṭṭiwjen yettawi waḍu n lebɣi n temlilit. Aman n lebḥar rrsen am trusi n lxaṭer yellan ɣef tizi n ṛṛwaḥ. Ttṛajun aḍar ara yersen ɣef lbabuṛ yettawin ur d-yettarra. Yettawi-ten d tirni, mi yers uḍar-nnsen di tmurt n lebɣi, ttuɣalen am teqruct tilemt deg-i ssenduyen ayefki: Iɣi ad yendu, tawaract ur tettili.. Iɛeqqayen n ubelluḍ ẓidit deg yimi-s, ssayasen-d imslayen-nni iḥninen yettwarun ɣef tebrat taneggarut…
Zira