Deg tɣiwant n Ayt Smaɛel, 65 n yikilumiṭren ɣer Unẓul-asamar n Bgayet, i d-tennulfa tddukkla tinmettit i yimeɛḍar d yimuḍan idumen « Tiɣri ». Tura azal n 4 n yiseggasen i yezrin, ayen tessaweḍ tga tddukkla-a yessefreḥ ddeqs n yimezdaɣ n temnaḍt-a. Aya acku, si tama tinmettit ladɣa, tewwi-d xilla n ubeddel d ubaɣur i yimdanen iɣef tettnaɣ. Gar yisenfaren-is imeqqranen dɣa, tella tneɣrit tuzzigt i d-teslal deg 2016 i warrac at wasrayen uzzigen i ilemmden deg-s kra n tarrayin d temsirin.
Ugar n tekci n wadeg d tegnit i kra n yiṭuṭaḥen imuḍan i yettwagin deg uɣerbaz unsib, iselmaden n tneɣrit-a tuzzigt, gar-asen imsujjiyen n tnefsit, sselmaden ayendin d tilufa i yimecṭaḥ-a, rnu ttɛawanen-ten ad d-leqqḍen tamussni. Degmi yelha wahil i xedmen, sendilindi ssawḍen skecmen yiwen n uqcic n wat asrayen uzzigen deg uɣerbaz amagnu anda ara ikemmel taɣuri-s, aseggas-a daɣen yetturaǧu ad tkemmel tneɣrit-a, rnu ad skecmen yiwen n ugrud-nniḍen deg uɣerbaz azayez. Ad d-nerr awellih d akken aṭas n tigawin i d-tettheggi tddukkla « Tiɣri ». Taneggarut-is ussan-a kan, i lmend n wass n tikci n yidammen, thegga-d ahil beddemma, seg 9h00 n tnezzayt armi d 12h00 n wass, i ujmaɛ n yidim.
Ɣer uxxam n yilemẓiyen n Ayt Smaɛel, ddeqs n yimdanen i yerzan ad fken cwiṭ seg yidammen-nsen, gar-asen wid yennumen yakan tignatin-a n tikci, d wid iwumi teḍra i tikkelt tamenzut neɣ tis snat. Ɣer taggara ihi, 40 n yisɛeddiyen i d-yellan, s wazal 30 n yimekciyen i yettwajerrden. Tigawt-a, teḍra-d s tallelt n usɣur azayez n udawi n Xerraṭa. Am dima, tga-d tddukkla « Tiɣri » aya deg wahil-is, imi txemmem ɣef yimuḍan d yimejraḥ i yesran i yidammen deg yisbiṭaren.
M. K.