Am yal aseggas, sfuggulen Yimaziɣen amenzu n Yennayer, neɣ tiwwura n useggas akken i as-qqaren, deg yal tamnaḍt n Tmazɣa, ladɣa deg tmurt n Lezzayer imi yuɣal d ass aɣelnaw n usgunfu yettwaxellasen. Ayen yeṭṭfen lwelha n useggas-a 2971/2021, d asebdad n Cacnaq deg tlemmast n temdint n Tizi Uzzu ara yalin azekka n umenzu n Yennayer. I usmekti, asenfar-a, ihegga-t-id Useqqamu Aɣerfan n Lwilaya n Tizi Uzzu s lmendad n uselway n tɣiwant n Tizi Uzzu akked kra n yimḍebbren n lwilaya-agi. Deg wahil n uzekka i d-ihegga Useqqamu Aɣerfan-a, ad yili usarag deg Uxxam n APW, afraq n warrazen i wid i d-yufraren deg Temsizzelt n usmuzzeɣ n twennaḍt i yexdem, diɣ, Useqqamu-agi, syin, ad yili imensi n yennayer. Seg tama-s, ihegga-d Useqqamu Unnig n Timmuzɣa yiwen wahil i lmend n usfuggel n umenzu n yennayer netta akked Tneɣaft n tmerrit i yebdan s wudem unṣib deg lwilaya n Tbatent ddurt-agi. Deg usiher-a, llan yisaragen, timsekniyin, asenzi s ubuddu n yidlisen, rnu ɣer waya, ssinima, tamezgunt, taklut, aẓawan…atg. Ula seg tama n yicennayen, aṭas i yessarmen ‘’Aseggaz ameggaz’’ s tezlit-nsen i d-suzren deg yiẓeḍwa inmettiyen, yecban Zedek Mouloud, Akli.D. d wiyaḍ. Ula d Ali Belhot, yessekles yiwen uklip anda i iɣenna ɣef ‘’useggas ameggaz’’ netta akked wiyaḍ s tutlayin n tmaziɣt yemgaraden, am teqbaylit, tacawit, tamẓabit, tacenwit…atg. D aklip ara d-yessuzer bab-is ass n yimensi n yennayer, ɣef wakken i t-id-iwekked deg tdiwennit i as-xedmeɣ ara tafem deg usebtar 12.
H.M.