Zrin 10 n yiseggasen segmi tesruḥ tezlit taqbaylit yiwen gar yinaẓuren ikesben ṣṣut ḥninen, i d-yernan i ccna tizlatin icebḥen. Wagi d Rahim, yecna ɣef tmetti, tagmat, maḥyaf, tamurt ; ladɣa ɣef tayri. Deg wass n yimayran i t-tewwi tmettant. Ilul Rahim ass n 7 duǧember 1963, deg taddart Imkechren deg Ait Aissa Mimoun. Leqraya-ines tamenzut, tella-d deg uɣerbaz Iɣil Buccen deg Ait Aissa Mimoun, syin ikemmel deg CNET n Tizi Uzzu i wazal n rebɛa n yiseggasen, dɣa din i yebda ikeccem-it lfen ɣer wul, imi icennu imir i yimidawen d yiselmaden-is. Deg 1974, Rahim yekseb ddabex, ma d xali-s yesɛa yiwet n tgiṭart n plastik, dɣa mbaddalen, akken Rahim ad as-yishil ubrid n ccna, acku, d yiwen i iɛecqen lfen. Deg 1979, iɛedda ɣer tesnawit Amirouche deg Tizi Uzzu, anida yessezri kraḍ n yiseggasen, deg useggas aneggaru i yessekles tizlit tamenzut «Takumt», uqbel ad d-ḍefrent tiyaḍ.
Yebda yettbin-d Rahim, ladɣa seld mi yezger ɣer tmurt n Fransa, deg yennayer 1984, anida yufa anaẓur Fahem uɣur yeqqim, yerna yexdem ɣur-s deg usečči yesɛa deg temnaḍt n Paris. Deg Meɣres, yedda yid-s ɣer studio n teẓrigin Azwaw deg Barbès, akken ad yessekles tasfift-ines tamezwarut. Syin, ḍefren-d yiḍebsiyen-nniḍen deg 1986 d 1990 ɣer teẓrigin Akfadou Music. Imir, Rahim, yettwassen aṭas, acku yuɣal gar yinaẓuren iwumi semḥasen s waṭas deg tmurt n leqbayel. 1992, iga tividyutin deg Paris i 7 n tezlatin. Deg 1995, yessuffeɣ-d tizlit swayes yettwassen daɣen “Ad am-iniɣ” akked Yasmina, d tizlit i yehda i tmeṭṭut-is tamenzut Fatiḥa, ukkud yemsebḍa. Iɛawed tissulya tikkelt-nniḍen akked Hamida, sɛan-d Massi deg 1997 akked Tafat deg 2000. Imir i yessekles Rahim snat n tezlatin akked Hamida, “Dda Weɛli”, “Ḥader iman-im”. Tewwi-t tmettant deg temdint n Tizi Uzzu ass, 13 furar 2010, akken dɣa i yemmut baba-s ɣef yiwen usemmud d yiwet n tmentilt, tazɣent n wul, talwit fell-asen.
Kh. A.