Dimecṭaḥ i d imal n tmaziɣt, ma nebɣa tamaziɣt ad tidir, ad temhaz, ad teḍfer abrid n tussna d taɣulin n usnulfu, yewwi-d kan ad tt-telmed teḍfert akken iwata, ilaq ad tettwaẓẓu leḥmala n tmaziɣt deg wallaɣen n yimecṭaḥ. Dɣa taggara-a aṭas n yifarisen i d-yettlalen d imaynuten i tecriḥta n yigerdan, ama d idlisen, d tizlatin –tividyutin d yizmamen i usuneɣ d tira. Ma d ayen i d-yellan d amaynut ass-nni n umenzu n yennayer 2970, iban ad dyernu abaɣur-is i uḥric-a.
D yiwet n tiliẓri Web i yewwin isem n “bebenneɣ”, iɣef tebges i usnulfu-s yiwet n terbaɛt n yilmeẓyen d telmeẓyin, d tin ara yefken afud i uckunṭeḍ n yigerdan deg laṣel-nsen, ad asen-tmud tagnit ad lemden, ad cnun, ad arun s tutlaytnsen, akken yes-s ad d-kkren, ayɣer ala, deg yimal ad uɣalen d imussnawen, d imesnulfuyen deg waṭas n taɣulin s tmaziɣt-nsen. Tiliẓri Web “bebe-nneɣ”, ar tura tebḍa ɣef kraḍ n yiḥricen; yal yiwen s wazal-is.
Izlan n mmi, d aḥric ara yeslemden i uqcic awalen imaynuten s teqbaylit, yal tikkelt, s tezlatin yessedhayen, neɣ s tezlatin-timucuha n yiɣersiwen (cantiques), (Md: Afruxnni-inu), d tadwilt i d-tessenɛat Tnina. Tayeḍ, d tadwilt i d-yessenɛaten iselsa swayes tettwassen tmazɣa s umata, d temnaḍt n leqbayel, u d tagnit i yimawlan ad awin tarwa-nsen ɣer usira n Tiliẓri, ad asen-selsen iselsa imaziɣen, deg tegnatin n tmeɣriwin deg yiɣerbazen (yennayer), deg yixxamen (amulli n tlalit), neɣ deg tddukkliwin (timsizliyin gar yinelmaden), tessenkad-itt-id tedwilt-a Lydia.
Akken daɣen i tella “Taɛcuct”, d tadwilt n wurar d usnulfu, deg yal uṭṭun, sin n yimdukkal ad fernen yiwen usentel, u ad ttmuddun isastanen fell-as, d urar ideg ara fernen yiwet n tririt gar kraḍ n yisteqsiyen. D tamecṭuḥt Kamilia i d-yessenɛaten tadwilt-a. I wid yebɣan ad sigzen tarwansen imecṭuḥen, ad naf tella tansa n internet: [email protected], neɣ deg facebook : bébé nnegh.
Kh. A.